61 տարի առաջ՝ 1953թ. դեկտեմբերի 1-ին Չիկագոյում լույս է տեսել տղամարդկանց Playboy ամսագրի առաջին համարը: Պարբերականը լույս է տեսել 70 հազար տպաքանակով: Դրա հիմնադիր Հյու Հեֆները սկզբում կասկածել է, որ երբևէ կթողարկի երկրորդ համարը:
Սակայն նրա մտավախությունները չեն իրականացել՝ մեկ շաբաթվա ընթացքում իրացվել է տպաքանակի երեք քառորդը, իսկ առաջին տասնամյակի վերջում ամսագիրը վաճառվել է ավելի քան մեկ միլիոն տպաքանակով: Ամսագրի հաջողության գաղտնիքը կայանում էր նրանում, որ այն արմատապես տարբերվում էր մինչ այդ լույս տեսնող տղամարդկանց ամսագրերից, որոնք հիմնականում լուսաբանում էին մարզական իրադարձություններ, արծարծում զբոսաշրջային թեմաներ և այլն:
Հեֆները մտածել էր, որ ամսվա մեջ մեկ անգամ ամսագիրը պետք է զարդարի որևէ գեղեցիկ մերկ աղջկա լուսանկար: Ամսագրի առաջին համարը զարդարել է Մերիլին Մոնրոյի մերկ լուսանկարը՝ 1949-ի էրոտիկ օրացույցից:
Տարբեր տարիներին ամսագիրը զարդարել են Մերիլին Մոնրոյի, Էլիզաբեթ Թեյլորի, Սինդի Քրոուֆորդի, Պամելա Անդերսոնի և այլ հանրահայտ կանանց լուսանկարները:
