Հունվարի 11-ին լրանում է Վրաստանի նախագահ Միխայիլ Սաակաշվիլիի կողմից համաներման մասին օրինագծի ստորագրման ժամկետը: Ինչպես հաղորդում է GHN-ը, եթե նախագահը չստորագրի հրամանագիրը, այդ գործընթացը կիրականացնի խորհրդարանի խոսնակ Դավիթ Ուսուպաշվիլին:
Համաներման օրենքն ուժի մեջ մտնելուց հետո սկսելու են ազատ արձակվել քաղաքական նկատառումներով ձերբակալվածները:
«Այս գործընթացը տևելու է առավելագույնը մեկ ժամ: Ինչ վերաբերվում է այլ կարգերի ձերբակալվածններին, ապա Վրաստանի պատիժների իրագործման նախարարությունը երկու շաբաթ ժամկետ է սահմանել, որպեսզի գործերը փոխանցվեն դատարան»,- ասել է պատիժների իրագործման և իրավական օգնության նախարար Սոզար Սուբարին:
Նա նշել է, որ երկու ամվա ընթացքում կվերանայվեն նրանց բոլոր գործերը, ովքեր ազատ են արձակվելու:
Ակնկալվում է, որ ամեն դեպքում օրենքը կստորագրվի հունվարի 12-ին, իսկ հունվարի 13-ին ազատության մեջ կհայտնվեն շուրջ 190 քաղբանտարկյալներ:
