Տարածքային կառավարման նախարարի պաշտոնակատար Վաչե Տերտերյանն այսօր «Լավագույն համայնք 2014» մրցանակաբաշխության ժամանակ «Առաջին լրատվական»-ի հարցին, թե ինչպե՞ս է գնահատում տարածքային կառավարման և արտակարգ իրավիճակների նախարարությունների միացումը, քանի որ դրանք գոնե գործառույթներով իրար հետ որեևէ կապ չունեին և դա ինչպես կարող է ազդել տարածքային կառավարման հետագա աշխատանքների վրա, պատասխանեց. «Ես համաձայն չեմ, որ որևէ կապ չունի, որովհետև գործադիր իշխանությունն ընդհանրապես մի միասնություն է և աշխատում է մի գաղափարի շուրջ, մի ուղղվածությամբ: Թե ինչ կառուցվածքով, սա արդեն այլ խնդիր է: Ամեն պարագայում, ամեն ժամանակաշրջանում կառուցվածքները կարող են այս կամ այն կերպ փոփոխվել և հարմարացվել օրվա հրամայականին կամ օրվա խնդիրներին»:
Ինչպես հայտնի է՝ ԱԺ-ն քննարկում է «Կառավարության կառուցվածքի մասին» օրենքում կառավարության առաջարկած փոփոխությունը, որով առաջարկվում է «էլ ավելի արդյունավետ կառավարման համակարգ ապահովելու համար» արտակարգ իրավիճակների նախարարությունը միացնել ՀՀ տարածքային կառավարման նախարարությանը: Մեկ այլ կետով կստեղծվի նոր՝ ՀՀ միջազգային տնտեսական ինտեգրման և բարեփոխումների նախարարություն:
Տարածքային կառավարման նախարարի պաշտոնակատարից հետաքրքրվեցինք թե, փաստորեն, այսօրվա հրամայականն այն էր, որ այդ երկու կառույցները միանայի՞ն, նաև խնդրեցինք նշել մի նմանություն այդ երկու նախարարությունների գործառույթների մեջ՝ հարցնելով, թե սա ավելի քաղաքակա՞ն փոփոխություն էր: «Նաև քաղաքական,-ասաց նախարարի պաշտոնակատարը՝ հավելելով,- բայց նաև բովանդակային առումով տարածքային կառավարման նախարարության հիմնական գործառույթները տարածքային զարգացման ծրագրերն են: Տարածքային զարգացման ծրագրերը պիտի ուղղված լինեն նաև որոշակի առումով լանդշաֆտի, երկրում առկա ռիսկերի, տեխնոաղետների, մարդածին աղետների կառավարմանը կամ էդ ռիսկերի նվազեցմանը: Ահա ձեզ բովանդակային ընդհանրություն: Բայց մյուս կողմից, պետք է նայեք ոչ թե ընդհանրություններին, այլ թե այս գործառույթները որքան կարող են մեկը մյուսին լրացնել և էֆեկտիվ դարձնել: Այս տեսանկյունից կարծում եմ, որ օրինակներ կարելի է բազմաթիվ բերել»:
Մեր հարցին, որ ասել է, թե՝ մինչ այժմ կառավարությունը չի՞ գիտակցել, որ այդ քայլի դեպքում կարելի է լավագույն կառավարում ապահովել, Տերտերյանն ասաց. «Մինչև հիմա չենք արել, որովհետև դա ակտուալ չի եղել կամ ամենաակտուալը դա չի եղել: Հիմա դա գտել ենք ակտուալ, արել ենք, և վտահ եմ, ավելի արդյունավետ կլինի կառավարության գործունեությունը»:
Մեր հարցին, թե ինքը կցանկանա՞ ղեկավարել նոր նախարարությունը, Վաչե Տերտերյանն ասաց, թե չի կարծում, որ իրեն կնշանակեն նախարար:
Մանրամասները դիտեք տեսանյութում:
