Ֆրանսիայի գանձապետարանը թողարկել է ոսկե ու արծաթե դրամների հավաքածու՝ ի հիշատակ բալետի ականավոր գործիչ Ռուդոլֆ Նուրեևի, որը կյանքից հեռացել է 20 տարի առաջ Փարիզում:
Դրամներն արդեն այսօր վաճառքի կհանվեն գանձապետարանում,- հայտնում է ITAR-TASS-ը։ Ընդհանուր առմամբ՝ պատրաստվելու է 12 հազար մետաղադրամ՝ 10 հազար հատ 22 գրամանոց, 37 մմ շառավղով արծաթե և 22 մմ շառավղով 2 հազար հատ ոսկե դրամներ:
Դրամների դիմերեսին պատկերված է Նուրեևի սիլուետը՝ Փարիզի օպերայի շենքի ֆոնին, դարձերեսին՝ հայտնի պարողի դիմանկարը՝ արված 25 տարեկանում:
Կոլեկցիոն դրամներինը դիպել է նաև ֆրանսիացի հայտնի դիզայներ Քրիստիան Լակրուայի ձեռքը:
Այս տարվանից սկսած՝ Ֆրանսիայի գանձապետարանը ձեռնամուխ է եղել «Յոթ արվեստ» (պար, երաժշտություն, ճարտարապետություն, կինո, քանդակագործություն, պոեզիա, գեղանկարչություն) անվանումով դրամների հավաքածուի թողարկմանը:
7 տարի շարունակ ամեն տարի պետք է թողարկվեն դրամներ՝ նվիրված արվեստի այս տեսակներից մեկին:
Նուրեևին նվիրված ոսկե ու արծաթե դրամները կվաճառվեն համապատասխանաբար 500 և 67 եվրոյով:
Նուրեևը ծնվել է 1938 թ. ԽՍՀՄ-ում և մանկությունից իրեն նվիրել է արվեստին։ 1961 թ. հունիսի 16-ին նա արտասահմանյան հյուրախաղերի ժամանակ մնաց Փարիզում և միայն քառորդ դար անց կարողացավ ոտք դնել հայրենիքում։
30-ամյա կարիերայի ընթացքում նա ունեցել է տասնյակ պարտիանր, բեմադրել ռուսական գրեթե բոլոր դասական բալետները, նկարահանվել է կինոյում, հանդես եկել աշխարհի առաջատար թատրոններում, 1983-1989 թթ. Գլխավորել է Փարիզի օպերայի բալետի խումբը։
1984 թ. նրա մոտ հայտնաբերվել է ՁԻԱՀ: Նուրեևը մահացել է 1993 թ. փարիզյան հիվանդանոցներից մեկում:
