Երուսաղեմի հայոց պատրիարքի տեղապահ Արիս արքեպիսկոպոս Շիրվանյանն «Առաջին լրատվական»-ի հետ զրույցում նշեց Երուսաղեմի առաջիկա տոները: Վաղը Սուրբ Աթոռի երկու տոներից մեկն է՝ նվիրված սուրբ Հակոբոս Տյառնեղբայրին, ում գերեզմանի վրա կառուցված է Սրբոց Հակոբյանց տաճարը և կանգնեցված է նրա գահը:
Սուրբ Աթոռի երկրորդ կարևոր տոնը Հակոբոս Զեբեդյան առաքյալի և նրա եղբոր՝ Հովհաննես Ավետարանչի հիշատակի տոնն է: Արիս սրբազանը նշեց, որ սուրբ Հակոբոս Զեբեդյանի գլուխը Սուրբ Հակոբյանց տաճարի մեջ է թաղված, և այդ օրը, ըստ ավանդույթի, աթոռակից պատրիարքը կպատարագի, բայց քանի որ Երուսաղեմի հայոց պատրիարքը մահացել է, որպես տեղապահ՝ Արիս սրբազանն անձամբ պետք է պատարագի:
Նա նշեց, որ ունեն նաև սարկավագներին նվիրված տոնախմբություն, որը երկուշաբթի օրն է նշվում։ «Ձեզ մոտ մեռելոց է, մեզ մոտ սուրբ Ստեփանոսի օրն է»,- ասաց սրբազանը՝ հավելելով, որ սրանք ավագ տոներն են, որ մեծ շուքով նշվում են, որոնց հաջորդում է Սուրբ Ծննդյան տոնը՝ հունվարի 18-19-ը։ 18-ին նախատոնն է, այդ առավոտ հանդիսավոր շքերթով գնում են Բեթղեհեմ։ Մինչև քաղաքի սահման Իսրայելի ոստիկանության առաջնորդությամբ են գնում, այստեղից դարձյալ ոստիկանների ուղեկցությամբ հասնում են մինչև Սուրբ Ծննդյան հրապարակը, որտեղ Բեթղեհեմի և շրջակա քաղաքների քաղաքապետերը դիմավորում են իրենց, շնորհավորում և միանում մինչև տաճարի մուտքը:
«Այս օրը, ամբողջ օրը Սուրբ Ծննդյան տաճարի մեջ արարողություն կանցկացնենք, երեկոյան ընդմիջում կունենանք՝ պաշտոնական ընդունելությամբ հյուրասիրություն կկատարենք, որին ներկա կլինի նաև նախագահը կամ վարչապետը»,- հավելեց սրբազանը:
