ԱՄՆ Ռազմածովային ուժերի «Ծովարջեր» հատուկ օպերացիաների ստորաբաժանման զինծառայող Ռոբերտ Օ՝Նիլը բրիտանական Daily Mail-ին հայտարարել է, որ հենց ինքն է 2011 թվականին պակիստանյան Աբոտաբադ քաղաքում ոչնչացրել «Ալ-Քաիդա» ահաբեկչական խմբավորման առաջնորդ Ուսամա բեն Լադենին:
Պարբերականի տվյալներով՝ 38-ամյա Օ՝Նիլի հետ մեծ հարցազրույցը նոյեմբերին կհեռարձակվի ամերիկյան Fox հեռուստաալիքով: Նա որոշել է ինքնությունը բացահայտել այն բանից հետո, երբ նրան զրկել են մի շարք սոցիալական նպաստներից՝ ծառայությունից վաղաժամ հեռացման պատճառով: Անհրաժեշտ 20 տարվա փոխարեն հատուկջոկատայինը ծառայել է 16 տարի:
Օ՝Նիլը ծնվել է Մոնտանայում, որտեղ մինչ օրս ապրում է հոր հետ: Նա բանակ է գնացել 19 տարեկանում՝ անհաջող ավարտ ունեցած սիրավեպից հետո: Նա մասնակցել է 400 ռազմական օպերացիաների, այդ թվում՝ Իրաքում և Աֆղանստանում: Թիվ 1 ահաբեկչի սպանության համար նրան հատուկ պարգև է շնորհվել:
