ՄԱԿ-ի գլխավոր քարտուղար Պան Գի Մունն ի գիտություն է ընդունել Պաղեստին պետությունը ճանաչելու Շվեդիայի որոշումը, բայց այն չի մեկնաբանի, քանի որ այդ հարցը համարում է համաշխարհային կազմակերպության անդամ յուրաքանչյուր առանձին երկրի գործը: TASS-ի հաղորդմամբ՝ Պան Գի Մունի այս դիրքորոշումը հինգշաբթի օրը լրագրողներին է փոխանցել նրա պաշտոնական ներկայացուցիչ Ստեֆան Դյուժարիկը:
«Այս կամ այն երկրի (անկախության) ճանաչումը հարց է, որն իրենց համար որոշում են իրենք՝ անդամ-երկրները (ՄԱԿ-ի): Գլխավոր քարտուղարը, իհարկե, տեղյակ է Շվեդիայի որոշման մասին: Սակայն այդպիսի որոշումներ ընդունում են իրենք՝ անդամ-երկրները, և ինքը դրանք չի մեկնաբանում»,- ասել է Դյուժարիկը:
Հինգշաբթի օրը Շվեդիայի ԱԳՆ ղեկավար Մարգոթ Վալսթրյոմը մամլո ասուլիսի ժամանակ հայտարարել է թագավորության կողմից պաղեստինյան պետությունը ճանաչելու մասին: Նրա խոսքով՝ այդ քայլը կնպաստի պաղեստինա-իսրայելական հակամարտության խաղաղ կարգավորմանը:
Պաղեստին պետությունը պաշտոնապես ճանաչել է 134 երկիր: Այն ընդգրկված է Արաբական պետությունների լիգայի կազմում, բայց ՄԱԿ-ի լիիրավ անդամի կարգավիճակ չունի՝ դիտորդ-երկրի իրավունքներով է:
