ԱԺ-ում 2015-ի բյուջեի նախագծի քննարկմանը ներկայացվեցին եվրոպական ինտեգրման հետ կապված ինչպես ֆինանսական ցուցանիշները, այնպես էլ ծրագրերը, որոնք իրականացվելու են ԵՄ-ի կողմից ստացվելիք գումարներով: Ֆինանսների փոխնախարար Պավել Սաֆարյանի խոսքով՝ նախատեսվում է երկու աղբյուրից գումար ստանալ. մեկը՝ նպատակային դրամաշնորհների, մյուսը՝ ուղղակի դրամաշնորհների ձևով: Նա բացատրեց դրանց տարբերությունները. նպատակային դրամաշնորհը տրվում է որևէ ծրագրի համար, որն այլ նպատակով օգտագործել հնարավոր չէ: 2015-ի բյուջեի մեջ այն կկազմի 14 միլիոն 387 հազար եվրո, իսկ 20 միլիոն եվրո էլ կտրվի ուղղակի դրամաշնորհների համար:
«Ամբողջության մեջ մենք Եվրամիության աջակցությամբ ստանալու ենք 34 դրամաշնորհ, 387 մլն եվրո գումար: Եվրոպական միության հարևանությամբ ներդրումային ծրագրի աջակցությամբ իրականացվող պետական սահմանի Բարգրատաշեն-Բավրա-Գոգավան անցման կետերի արդիականացման դրամաշնորհային ծրագրերի գծով ստանալու ենք 6 մլն 120 հազար եվրո գումար, Եվրոպական միության աջակցությամբ իրականացվող անցակետերի իրականցման դրամաշնորհային ծրագրերով ստանալու ենք 2 մլն, 2,8 միլիոն եվրոն ստանալու ենք ԵՄ աջակցությամբ իրականացվող Հայաստանի համայնքների ջրային ծրագրի տեսքով»,- ասաց Պավել Սաֆարյանը:
20 մլն եվրոն ստանալու ենք որպես բյուջետային աջակցություն, որը, ըստ Պավել Սաֆարյանի, բաշխված է երեք խումբ դրամաշնորհների, մեկը՝ մասնագիտական կրթության և ուսուցման՝ ՄԿՈՒ բարեփոխման շարունակման ծրագրի համար՝ 3 մլն եվրո դրամաշնորհ, 7 մլն ստանալու ենք 2011 ազգային գործողությունների ծրագրով ապագա ասոցացման ծրագրի թիվ փուլ երկուսով նախատեսված գումարները 7 մլն եվրո, և փուլ երեք՝ աջակցություն Հայաստանում դատական բարեփոխումներին՝ 8 մլն եվրո:
Նաիրա Զոհրաբյանը հարց ուղղեց, թե ԵՄ տարբեր պաշտոնյաների հետ զրույցներում մտահոգություններ կան դրամաշնորհների նպատակային ծախսման վերաբերյալ. «Լինենք անկեղծ. դրանք ոլորտներ են, որտեղ անպասելի կերպով փոշիանում են գումարներ: ԵՄ դեսպանի հետ ենք հանդիպել, որն առաջարկում է վերահսկողական մարմին ստեղծել, որը կվերահսկի այդ գումարները»,- ասաց նա:
Ի պատասխան՝ Պավել Սաֆարյանը նշեց, որ, իհարկե, այդ հարցը մտահոգում է մեր հանրությանը, ԱԺ-ին, կառավարությանը: Նրա խոսքով՝ կասկածի տակ որևէ մեկը չի կարող դնել դասախոսնությունների, կրթական ծրագրերի և փորձի փոխանակման անհրաժեշտությունը, ուսուցման պրոցեսը, և չպետք է ինքնաբավ լինենք ու կարծենք, որ նորամուծությունների կարիք չունենք. նպատակը դնում ենք մի բան, արդյունքներն այլ բան ենք ստանում: Ինչպես կարելի է վերահսկել դա. ԵՄ վերահսկիչ պալատի միջոցով են հսկվում, ինչպես նաև ֆինանսների նախախարարության վերահսկողության մարմնի կողմից»:
