Հունահռոմեական ոճի ըմբշամարտի Եվրոպայի չեմպիոն, Օլիմպիական խաղերի բրոնզե մեդալակիր Արթուր Ալեքսանյանն 1in.am Sport-ի հետ զրույցում ասաց, որ 2012 թվականը հաջող տարի էր իր համար, իսկ մեծագույն կորուստը համարում է օլիմպիական ոսկին.
«2012 թվականը հաջող էր ինձ համար: Դարձա Եվրոպայի չեմպիոն, Օլիմպիական խաղերում նվաճեցի բրոնզե մեդալ: Մեծագույն ձեռքբերումս օլիմպիական բրոնզն էր, իսկ կորուստը` օլիմպիական ոսկին: Տարվա ամենաբարդ հաղթանակը Օլիմպիական խաղերում թուրք ըմիշի նկատմամբ հաղթանակն էր:
Անբացատրելի զգացողություններ ես ունենում, երբ բարձրանում է քո երկրի դրոշը: Հպարտություն եմ զգում:
2013 թվականին մասնակցելու եմ Եվրոպայի և Աշխարհի առաջնություններին` մարտ և սեպտեմբեր ամիսներին: Փորձելու եմ հաղթող ճանաչվել: Հունվարի 15-ից նորից սկսվելու են մարզումները, իսկ հունվարի 25-ին մասնակցելու ենք միջազգային մրցաշարի` Դանիայում:
Մաղթում եմ ամենակարևորը առողջություն, հաջողություն, մեր մարզիկներն էլ հասնեն մեծ բարձունքների»:
