Ամանորը հրաշքների շրջան է, թեև ոչ բոլորին են դրանք հաջողություն բերում: Որոշ տարօրինակություններ, որոնք տեղի են ունենում տոնի նախօրեին, այլ կերպ, քան անհեթեթություն, չես անվանի: Time պարբերականի լրագրողները ստեղծել են ամենահիմար և տհաճ պատահարների վարկանշային ցանկը:
Սանտա Կլաուս գոյություն չունի
Նոյեմբերի վերջին ոստիկանությունը ձերբակալել է Օնտարիոյի 24-ամյա մի բնակչի, ով ամանորյա ամենամյա շքերթի ժամանակ քայլել է փողոցով և բղավել ճանապարհին հանդիպած բոլոր երեխաներին, որ Սանտա Կլաուսին մեծահասակներն են հորինել: Երիտասարդը շատ հարբած է եղել: Նրա մազերը տարբեր կողմ են ցցված եղել՝ ինչպես սատանայի կոտոշներ: Եվ, իհարկե, ինչը կարող էր ավելի ահավոր լինել, քան Ամանորի նախօրեին կոտրել երեխաների գլխավոր երևակայություններից մեկը:
Գողացել են երեխաների տոնը
Դեկտեմբերի սկզբին Բոստոնի տնտեսական խանութի աշխատակցին արթնացրել է հեռախոսազանգը: Դա ոստիկանությունն էր: Իրավապահները հայտնել են տղամարդուն, որ նրա խանութ անցած գիշեր գողեր են ներթափանցել և գողացել են երաժշտական կենտրոնը, ինչպես նաև մի քանի տասնյակ ամանորյա եղևնիներ, որոնց վաճառքից ստացված գումարը պետք է ուղղվեր որբ երեխաների օգնությանը: Վերջին տարվա ընթացքում տղամարդը տարբեր մանկատների նվիրաբերել է 15.000 դոլար, որն աշխատել է եղևնիներ վաճառելով:
Ռեգբիստը ծեծել է Սանտա Կլաուսին
Ռեգբիի պրոֆեսիոնալ խաղացող Ռիչարդ Օուենին դատապարտել են 200 ժամվա պարտադիր աշխատանքների կատարման. նա փողոցում հարձակվել է Սանտա Կլաուսի հագուստով մի մարդու վրա, նրան գետնին տապալել և կոտրել ծնոտը: Չնայած, որ դեպքը տեղի է ունեցել մեկ տարի առաջ, դատավճիռը կայացվել է վերջերս: Օուենը հայտարարել է, որ այդ պահն իր կյանքում «սև շրջան» էր, քանի որ նա վնասվածքի պատճառով երկար ժամանակ չէր կարողանում խաղալ:
Հեռուստացույցը երեխայից թանկ է
Նախատոնական զեխչերի ամենաթեժ պահին ամերիկյան Սփրինֆիլդ քաղաքի բնակիչը գնացել է խանութ և իր համար 51 դյույմանոց հեռուստացույց գնել: Միայն թե տղամարդը մոռացել է, որ գնումների գնացել է ոչ թե մենակ, այլ իր ընկերուհու երկու տարեկան որդու հետ: Ոստիկանությունը երեխային գտել է խանութի մոտ կայանված ավտոմեքենայում: Երբ ոստիկանությունը ժամանել է բազմոցին հեռուստացույցի դիմաց պառկելու սիրահարի տուն, նա տեղադրելիս է եղել իր նոր ձեռքբերումը: Տղամարդու խոսքերով՝ ինքը նկատել էր, որ երեխան անհետացել է, բայց կարևոր չի համարել որևէ մեկին այդ մասին հայտնել: Անհասկանալի է, թե ինչու երեխայի հետ ավտոմեքենայով գնումների մեկնած տղամարդը տուն է վերադարձել ոտքով, այն էլ իր հետ բերելով հեռուստացույցը: Տղամարդուն կարող է սպառնալ պայմանական ազատազրկում՝ երեխայի նկատմամբ անփույթ վերաբերմունքի համար:
