Եվս մեկ տարի մոտենում է ավարտին, և Google-ը, ինչպես և անցած տարի, մեզ կոչ է անում ետ նայել: Երբ մենք ապրում էինք առօրյա կյանքով, եղել են պահեր, որոնց մասին ապագա սերունդները, հնարավոր է, կարդան ուսումնական ձեռնարկներում` որպես բացառիկ ձեռքբերումներ կամ էլ մարդկային ողբերգություններ:
Ֆելիքս Բաումգարթների թռիչքը ստրատոսֆերայից բացում և փակում է Googlе-ի տպավորիչ տեսանյութը: Նրա անկմանը հետևել է ամբողջ աշխարհը, և հենց այն ցույց տվեց մարդու նոր հնարավորությունները:
Ամռանը միլիոնավոր մարդիկ տոնել և հուզվել են Լոնդոնի Օլիմպիական խաղերի ժամանակ, իսկ հետո նաև Պարաօլիմպիկ խաղերին: Այդ օրերին բազմաթիվ ժողովուրդներ միասնաբար ոգևորել են իրենց մարզիկներին: Եվ կարծես թե այդ շրջանում չի եղել ոչ սով, ոչ պատերազմ, ոչ հիվանդություն: Մի քանի ամիսների ընթացքում սպորտը ամենակարևորն է եղել:
Մենք դեռ բավականին լավ ենք հիշում նախագահ Բարաք Օբամայի և Միթ Ռոմնիի մենամարտը: Այդ մենամարտը համընկավ ավերիչ «Սենդի» փոթորիկի հետ:
Աշխարհը այս տարի բացառիկ մարդկանց է կորցրել, այդ թվում` Գոռ Վիդալին, դերասան և պրոդյուսեր Էնդի Գրիֆիտին, ամերիկյան լրագրող Մայք Ուոլլեսին, երգչուհի Ուիթնի Հյուսթոնին…
Կարևորագույն իրադարձություններ, հայտնի մարդիկ, իրական էմոցիաներ… 2012թ.-ը Google-ը տեղակայել է ոչ ամբողջական երեք րոպեների մեջ:
