Ադրբեջանական Salamnews.org կայքի փոխանցմամբ, ադրբեջանական քաղաքագետ Արաստուն Օրուջևն անդրադարձել է Հայաստանի կողմից իրենց կորուսյալ տարածքների բնակեցման խնդրին.
«Ադրբեջանը պետք է Հայաստանից անհապաղ պահանջի վերջ դնել «օկուպացված տարածքների ապօրինի» բնակեցմանը: ԵԱՀԿ Մինսկի խմբի առաքելության ներկայացրած հաշվետվությունը մեծ մտահոգություն է առաջացրել Երևանում, ինչի մասին վկայում է Հայաստանի արտգործնախարարության արձագանքը:
Ես հասկանում եմ, որ այդ հաշվետվությունը ձեռնտու չէ հայկական կողմին, ով ձգտում է ամեն գնով խուսափել դրա արդյունքներից: Հայկական կողմը ոչ միայն «դանդաղեցնում» է բանակցությունների ընթացքը, այլև «ապօրինաբար» ցանկանում է վերաբնակեցնել «օկուպացված տարածքները» և, մասնավորապես, Լեռնային Ղարաբաղի տարածքի մեջ չմտնող Լաչինն (Բերձոր) ու Քելբաջարը (Քարվաճառ):
Ես կարծում եմ, որ Ադրբեջանը պետք է պնդի, որ այդ տարածքները մաքրվեն հայկական բնակչությունից, հակառակ դեպքում ոչ մի բանակցության մասին խոսք լինել չի կարող»:
