Ադրբեջանական Salamnews.org կայքի փոխանցմամբ, Մեքսիկան խորապես շահագրգռված է Ադրբեջանի հետ առևտրա-տնտեսական և, մասնավորապես, էներգետիկ համագործակցության զարգացման հարցում: Այս մասին հայտարարել է Մեքսիկայի արտգործնախարար Պատրիսիա Էսպինոզա Կանտեյանոն Մեքսիկայում գտնվող Ադրբեջանի արտգործնախարար Էլմար Մամեդյարովի հետ հանդիպման ժամանակ:
Էսպինոզայի խոսքերով, իրենք մտադիր են մեքսիկացի երիտասարդների գործուղել Ադրբեջան, ուր և նրանք կուսանեն տեղի նավթային ակադեմիայում: Խոսքը, մասնավորապես, էներգառեսուրսների մշակման գործի յուրացման մասին է:
Էլմար Մամեդյարովն իր հերթին նշել է. «Վերջին տարիներին Ադրբեջանը մեծ առաջընթաց է գրանցել քաղաքական, տնտեսական և էներգետիկ ոլորտներում: Ադրբեջանը Լատինական Ամերիկայում իր առաջին դեսպանատունը բացել է հենց Մեքսիկայում: Ադրբեջանն ու Մեքսիկան նավթ արտադրող երկրներ են և պետք է կարողանան առավել լավ օգտագործել այդ ոլորտում իրենց պոտենցիալը»:
