Կազմակերպիչների տվյալներով՝ մոտ 80 հազար ուսանողներ այսօր դուրս են եկել իտալական քաղաքների փողոցներ ու հրապարակներ՝ բողոքելու կրթության և աշխատանքային օրենսգրքի բարեփոխումների դեմ, որոնք առաջարկել է Մատեո Ռենցիի կառավարությունը: Այս մասին հայտնում է Corriere della Sera-ն:
Թերթի հաղորդմամբ՝ բողոքի ակցիաներ են անցկացվել Հռոմում, Միլանում, Պալերմոյում, Բարիում, Պերուջայում և այլ քաղաքներում: Միայն Հռոմում միաժամանակ անցկացվել է 3 ուսանողական երթ:
Որոշ քաղաքներում տեղի են ունեցել փոքր միջադեպեր, սակայն ընդհանուր առմամբ բոլոր ցույցերն անցել են հանգիստ մթնոլորտում:
Սեպտեմբերի սկզբին Իտալիայի վարչապետ Մատեո Ռենցին ներկայացրել է առաջիկա 3 տարվա իր ծրագիրը:
Մասնավորապես, Ռենցիի կառավարությունը մտադիր է մինչև տարվա վերջ փոխել աշխատանքային օրենսդրությունը՝ որպես հիմք վերցնելով Գերմանիայի փորձը: Բացի դրանից՝ մինչև 2017թ. մայիս կարվեն դատական, կրթության, ձեռնարկատիրական գործունեության և օտարերկրյա ներդրումների ոլորտներում բարեփոխումներ, ինչը հնարավորություն կտա ստեղծել նոր աշխատատեղեր: Ծրագրվում է նաև վերանայել Իտալիայի վերաբերմունքը միասեռ ամուսնությունների նկատմամբ:
