Սիրիայի հարցով ՄԱԿ-ի և ԱՊԼ-ի հատուկ պատվիրակ Լախդար Բրահիմին հայտարարել է, որ Դամասկոսում բանակցություններ է անցկացրել Սիրիայի նախագահ Բաշար Ասադի հետ: Սակայն նա չի հստակեցրել` հաջողվե՞լ է իրեն առաջընթացի հասնել սիրիական հակամարտության կարգավորման բանակցություններում, թե՞ ոչ: Այս մասին գրում է Interfax-ը:
«Ես պատիվ եմ ունեցել հանդիպելու նախագահի հետ: Մենք կարծիքներ ենք փոխանակել բազմաթիվ փուլերի մասին, որոնք պետք է անցնենք ապագայում»,- հայտարարել է Բրահիմին բանակցություններից հետո:
Բրահիմին երեկ Դամասկոս էր ժամանել Լիբանանից: Նա մեքենայով էր գնացել, քանի որ Դամասկոսի օդանավակայանի շրջանում իրադրությունն անվտանգ չէ:
Լախդար Բրահիմին Դամասկոս էր տարել սիրիական ճգնաժամի կարգավորման ճանապարհային քարտեզը: Ծրագիրը պատրաստվել էր հունիսի 30-ին Ժնևում ԱՄՆ-ի, Ռուսաստանի, Չինաստանի, եվրոպական և արաբական երկրների դիվանագետները, ինչպես նաև միջազգային կազմակերպությունների ներկայացուցիչնեի կողմից ընդունված որոշումների հիման վրա:
Ըստ այդմ` սիրիացիներին առաջարկում են անցումային կառավարություն ձևավորել, որը բաղկացած կլինի ինչպես իշխանության, այնպես էլ ընդդիմության ներկայացուցիչներից: Այդ կառավարությունն իր հերթին կոչված է անցկացնել խորհրդարանական և նախագահական ընտրություններ:
Բրահիմիի առաքելությունն ավելի բարդ է, քան նրա նախորդինը՝ Քոֆի Անանինը, որը պաշտոնաթող եղավ այս տարվա ամռանը:
