Եվրամիության էներգետիկայի հարցերով հանձնակատար Գյունտեր Էթինգերը կոչ է արել Ռուսաստանին չխոչընդոտել Nabucco գազատարի կառուցմանը: Այս մասին հաղորդում է Deutsche Welle-ն: Մոսկվան իրավունք չունի ճնշում գործադրել միջինասիական երկրների վրա, որպեսզի վերջիններս հրաժարվեն Nabucco-ին մասնակցելուց: Այս մասին Էթինգերն ասել է` ելույթ ունենալով Բեռլինում կազմակերպված կոնֆերանսին:
Նա միաժամանակ խոստացել է, որ Եվրամիությունը չի խոչընդոտի ռուսական South Stream նախագծին` նշելով, որ Nabucco-ն South Stream-ի մրցակիցը չէ: «Ես ողջունում եմ Ռուսաստանին՝ որպես գործընկերոջ, որը գազ է մատակարարում (Եվրոպային.– 1in.am), սակայն երրորդ երկրներից գազային մատակարարումների համար ավելի նախընտրելի են կարճ ճանապարհները, այլ ոչ թե շրջանցիկները Ռուսաստանի տարածքով»,- ասել է նա:
Նշվում է, որ եվրոպացի հանձնակատարի ելույթը հնչել է այն բանից հետո, երբ Ռուսաստանի փոխվարչապետ Սեչինը հայտարարել էր, թե Nabucco-ն ապագա չունի: «Հաշվի առնելով թուրքմենական և եվրոպական, ինչպես նաև համաշխարհային փորձագետների գնահատականները` գազային շուկայում ընթացիկ իրավիճակը թույլ է տալիս ասելու,- և ես սա ասում եմ առանց հեգնանքի,- որ Nabucco-ն ապագա չունի»,- ասել էր Սեչինը: «Չկան ծավալների մեծացման իրական հեռանկարներ, ինչն անհնար է դարձնում Nabucco նախագծի իրականացման անհրաժեշտությունը: Այդ մասին կարելի է մոռանալ մինչև տնտեսական աճի որոշակի պահը»,- ավելացրել է ՌԴ փոխվարչապետը: