Ես չեմ թաքնվել և չեմ պատրաստվում դա անել հետագայում՝ լրագրողներին հայտնել է Վրաստանի Էներգետիկայի և ֆինանսների նախկին նախարար Ալեքսանդր Հետագուրին: «Քննության մեկնարկի մասին տեղեկությունը ես ունեցել եմ: Այդ ժամանակվա ընթացքում ես եղել եմ նաև երկրի սահմաններց դուրս, սակայն չեմ թաքնվել, դա չեմ անի նաև ապագայում»,-վստահեցրել է նա: Այս մասին փոխանցում է Gruziya Online-ը:
«Թելասի» ընկերության գլխավոր տնօրեն Դևի Կանդելակիի խոսքով՝ ինքը ևս տեղեկացված է եղել տարվող հետաքննության մասին, սակայն չի օգտվել երկիրը լքելու հնարավորությունից:
«Ես այնքան հիմար չեմ, որ չիմանամ, թե մինչև ուր կտանի այս ամենը, սակայն ես ոչ մի տեղ չեմ փախել: Իմ ընտանիքն այստեղ է: Ես գրել եմ, ինչ գիտեի»,- ասել է Կանդելակին:
Արդարադատության և կրթության նախկին նախարար Նիկա Գվարամիան, որը ներկայում «Ռուսթավի 2» հեռուստաընկերության գլխավոր տնօրեննն է, իր հերթին հայտարարել է, որ ինքը մեղավոր չէ և դա կապացուցի:
«Եթե ինչ-որ մեկը կարծում է, որ Նիկա Գվամարիան կհաշտվի կաշառակերի և փողեր լվացողի ածականի հետ, թող սեփական խղճին նայի: Ինչպես երևում է՝ նա դատում է սեփական խղճով»,- նշել է Գվամարիան:
Էկոնոմիկայի նախկին փոխնախարար Կախա Դամենիան ընդգծել է, որ իր համար իր անունը շատ կարևոր է՝ հատկապես այն բիզնեսում, որը ներկայում նա վարում է:
«Տարբեր պաշտոններում աշխատելիս, ես շատ հնարավորություններ եմ ունեցել կաշառք վերցնելու, սակայն դա չեմ արել: Ես թույլ չեմ տա, որ ինչ-որ մեկի մոտ տպավորություն ստեղծվի, որ ես ինչ-որ ժամանակ որևէ առնչություն եմ ունեցել կաշառքների հետ: Ես խորհրդատվական բիզնեսում եմ: Այստեղ կարևորը բարի անունն է»,-ասել է Դամենիան:
