«Ազատ դեմոկրատներ» կուսակցության փոխնախագահ Անուշ Սեդրակյանը, անդրադառնալով վերջին օրերի համագումարների ընթացքում հնչած ելույթներին, թե ինչ կապ ունեն դրանք քաղաքացու խնդիրների հետ, նշեց՝ քանի որ հիասթափության գործոնը շատ մեծ է Հայաստանում, դրա համար մենք ունենում ենք տարիների անպտուղ պայքար, որի ընթացքում ակնհայտորեն տեսնում ենք, որ ոչինչ չի բարելավվում: «Ազատ դեմոկրատներ» կուսակցության փոխնախագահը Հայաստանում պոզիտիվ գործոն, այնուամենայնիվ, արձանագրում է, այն է՝ քաղաքական դաշտի բոլոր անորոշությունների մաքրումը: «Այսուհետ եթե անգամ ճշմարտությունը կապված է հիասթափությունների հետ, միևնույն է, դա ճշմարտություն է, երկրորդ՝ Հայաստանի ներկայիս ղեկավարումն արդեն անհնար է նաև իշխող համակարգի համար, և դա ակնհայտ է»,- ասաց ԱՆուշ Սեդրակյանը՝ հավելելով, որ բոլոր բարեփոխումները չեն արվում մեծ ցանկությունից դրդված, արվում են իսկապես կենսական անհրաժեշտությունից ելնելով, քանի որ ինչքան էլ ասեն՝ ժողովրդին անտեսում են և արհամարհում, միայն բնակչության աճն է լուծում պետության կայունության խնդիրը, և բնակչության համար պետք է ստեղծվեն քիչ թե շատ տանելի պայմաններ:
Ըստ նրա՝ այլ հարցադրում է՝ ինչի՞ հաշվին են ստեղծվելու այդ պայմանները, եթե դա ստեղծվելու է իշխող էլիտայի մի մասի իրավունքները ճնշելով և առաջացած ռեսուրսն ուղղելով դեպի հասարակություն, դա հարցի լուծում չէ, որովհետև էլիտան վաղ թե ուշ, առավել դժգոհ լինելով, փորձելու է ապստամբել:
Երկրորդ տարբերակը, ըստ Անուշ Սեդրակյանի, ընդհանուր ադմինստրատիվ վարչական ռեսուրսի խորքային համակարգային փոփոխությունն է, որը շատ ավելի դժվար գործընթաց է. «Միայն այդ գործընթացն է ի զորու լուծել Հայաստանի խնդիրները, դրա համար այս փուլում, իհարկե, բոլորն ասելու են լավագույնը, և դա իրենց անկեղծ ցանկությունն է, իրենք մեղավոր չեն, որ այդ ցանկությունը չի համապատասխանում իրականությանը, և պատասխանատվությունն ընկնում է այն մարդկանց վրա, ում ձեռքին իշխանական և տնտեսական լծակներն են: Սա անվիճելի է, և իրենք պետք է որոշեն՝ պետությունը պահպանվելու է, թե ոչ», -ասաց Անուշ Սեդրակյանը: Նրա խոսքով՝ պետությունը պահպանվում է ոչ միայն սահմանների անվտանգությամբ, ազգայնական գաղափարախոսության միջոցով, այլ պետությունը պաշտպանված է այնտեղ ապրող հանրային տրամադրությամբ: «Հիմա այդպիսի գործոնը մեզ մոտ չի աշխատում, և այդ գործոնը պետք է վերականգնենք»,- նշեց նա:
Ի՞նչն էր պատճառը, որ մի քանի տարի առաջ նման ելույթներ չէին հնչում, ըստ նրա՝ օբյեկտիվ վիճակը թույլ էր տալիս դադարը, հիմա օբյեկտիվ իրավիճակը այլևս դադարի հնարավորություն չի տալիս, և պետք է գործել շատ արագ:
