Սիրիայի տարածքում ամերիկյան ռազմաօդային ուժերի կողմից «Իսլամական պետություն» և «Ջեբհաթ Ալ-Նուսրա» ահաբեկչական խմբավորումների գրոհայինների դիրքերին հասցրած ավիահարվածների զոհ է դարձել առնվազն 8 խաղաղ բնակիչ, որից 3-ը՝ երեխաներ: Այս մասին հայտնում է Reuters գործակալությունը՝ հղում անելով Մարդու իրավունքների պաշտպանության մոնիտորինգի սիրիական կենտրոնին:
Նշվում է, որ ավիահարվածների հետևանքով սպանվել է առնվազն 30 գրոհային: Ինչպես հստակեցրել է կազմակերպության ներկայացուցիչը, ավիահարվածների ժամանակ վնասվել է Հալեպ նահանգում գտնվող բնակելի մի շինություն, որում ենթադրաբար գտնվել են «Ջեբհաթ Ալ-Նուսրայի» գրոհայինները:
Ինչպես հայտնում է Fox News հեռուստաալիքը, ԱՄՆ կենտրոնական հրամանատարությունը հստակեցրել է, որ ԱՄՆ-ն նաև ավիահրավածներ է հասցրել մեկ այլ ահաբեկչական կազմակերպության՝ «Խորասանի» 8 օբյեկտների: Խմբավորումը գլխավորում է «Ալ-Քաիդայի» պարագլուխներից մեկը՝ Մուհսին Ալ-Ֆազլին:
