Լիբանանյան բանակը վերջին 3 օրերին 50 գրոհայինի է ոչնչացրել Սիրիայի հետ սահմանին գտնվող Էրսալ քաղաքի շրջանում: Այս մասին գրում է լիբանանյան «Ալ-Սաֆիր» թերթը:
Պարբերականը նշում է, որ սահմանամերձ տարածքներում գրոհայինների դիրքերի ուղղությամբ արձակվող կրակին զուգահեռ՝ լիբանանցի զինվորականները նախաձեռնել են ահաբեկչության մեջ կասկածվող մի քանի քաղաքացիների ձերբակալման ռեյդեր: Նրանք թաքնվել են Էրսալից ոչ հեռու՝ սիրիացի փախստականների ճամբարներում: Արդյունքում ձերբակալվել է 140 մարդ, մեծամասնությունը՝ Սիրիայի քաղաքացիներ: Նրանցից 35-ը խոստովանել են լիբանանյան բանակի դեմ մարտական գործողություններին մասնակցությունը և նոր ահաբեկչական գործողությունների նախապատրաստումը:
Լիբանանյան բանակը բաց առճակատում է սկսել ահաբեկչության դեմ այն բանից հետո, երբ որոշում է ընդունվել, որ երկրի կուսակցություններից ոչ մեկը ահաբեկչության դեմ գործողություններում չի կարող սահմանափակել կամ խոչընդոտել զինվորական ղեկավարությանը:
