«Առաջին լրատվական»-ը զրուցել է ՀՅ Դաշնակցության բյուրոյի ներկայացուցիչ Հրանտ Մարգարյանի հետ:
– Պարոն Մարգարյան, ինչպե՞ս եք մեկնաբանում այն հանգամանքը, որ Դաշնակցություն կուսակցությունը սահմանադրական փոփոխությունների պատճառով չի ցանկանում մասնակցել քառյակի՝ նախապես պլանավորված հանրահավաքին:
– Հանրահավաքն այն միջավայրը չէ, որտեղ քննարկում տեղի ունենա: Եվ երկու հակադիր տեսակետներ նույն հարթակի վրա չեն կարող լինել:
– Քառյակի երեք ուժերը կարծում են, որ սահմանադրական փոփոխություններով Սերժ Սարգսյանն ու իշխանությունները ցանկանում են վերարտադրվել:
– Իրականում սխալվում են, իշխանությունը կարող է վերարտադրվել այս համակարգում և մինչև հիմա այս համակարգում է, որ վերարտադրվել է: Հակառակը՝ համակարգային փոփոխությունները դա կկանխեն: Բայց նաև կկանխեն որոշ ուժերի, այսպես ասած, իշխանության հեշտ ձեռք բերումը, որովհետև շատ ավելի լուրջ կդառնա ժողովրդի համակրանքը շահելով՝ իշխանություն ունենալը:
– Որոշ ուժեր ասելով՝ ո՞ւմ նկատի ունեք: Նաև՝ քառյակի՞ ուժերին նկատի ունեք:
– Բոլոր բոլորին:
– Մեխանիզմ է նշվում, որ խորհրդարանական կառավարման դեպքում Հանրապետական կուսակցությունը կրկին կփորձի հաղթել խորհրդարանական ընտրություններում, և Ս. Սարգսյանը, քանի որ այս անգամ չի կարող առաջադրվել որպես նախագահի թեկնածու, կդառնա Ազգային ժողովի նախագահ:
– Ինչո՞ւ, հիմա չի՞ կարող, մինչև հիմա ինչպե՞ս է հաղթել: Իսկ հիմա ինչո՞ւ չի կարող: Չէ, սխալ է, շատ սխալ է:
– Այս դեպքում էլ Դաշնակցությանը մեղադրում են իշխանությունների հետ համագործակցելու մեջ:
– Մեղադրողները թող անկեղծանան և ասեն, թե որն է իրենց նպատակը: Իրական նպատակն ինչ է:
– Ի՞նչ է:
– Ես հետո կպատասխանեմ:
Հ.Գ.- Հ. Մարգարյանն այսօր մասնակցում էր «Հայաստան-Սփյուռք» խորհրդաժողովին: Համաժողովի հիմնական միջոցառման ժամանակ նա սփյուռքահայ մյուս կուսակցությունների ղեկավարների և Լեռնային Ղարաբաղի նախագահ Բակո Սահակյանի, ՀՀ վարչապետ Հովիկ Աբրահամյանի, Ամենայն հայոց կաթողիկոս Գարեգին Բ-ի, Մեծի տանն Կիլիկիո Արամ Առաջին կաթողիկոսի և այլոց հետ նստած էր բեմում՝ նախագահությունում: Հ. Մարգարյանը՝ որպես ՀՅԴ ղեկավար, նաև ելույթ ունեցավ: Իսկ ելույթից հետո նստեց անմիջապես Հ. Աբրահամյանի կողքին և սկսեց ակտիվ զրուցել նրա հետ:
