«Երբ որ կլինի Սահմանադրական բարեփոխումների նախագծի տարբերակը, այն ժամանակ էլ մենք պատրաստ կլինենք բաց քննարկումների՝ ինչպես միշտ ենք եղել, և կհայտնենք մեր մոտեցումը: Եթե դրանք մեր մոտեցումներին, դիրքորոշումներին չեն համապատասխանի, ապա մենք կպլանավորենք և կիրականացնենք մեր քայլերը»,- այսօր Սահմանադրական բարեփոխումների թեմայով քննարկումից հետո ասաց ՕԵԿ-ական պատգամավոր Մհեր Շահգելդյանը՝ պատասխանելով «Առաջին լրատվական»-ի հարցին, որ եթե նախագիծն այս տեսքով դրվի հանրաքվեի, ՕԵԿ-ը՝ որպես ընդդիմություն, ինչպե՞ս է պայքարելու դրա ընդունման դեմ:
Սահմանադրական բարեփոխումներից զատ, Շահգելդյանից հետաքրքրվեցինք «թեժ աշնան» շրջանակներում ՕԵԿ-ի պլաններից և քառյակի հետ հետագա համագործակցությունից: ՕԵԿ պատգամավորը նշեց, որ քառյակի կողմից հրավեր չի եղել մասնակցելու առաջիկա հանրահավաքին:
«Ինչ վերաբերում է ՕԵԿ-ին, հիշեցնեմ, որ մենք արդեն իսկ անցկացրինք բազմահազարանոց հանրահավաք: Հետագայում ևս մեր գործողություններով պատրաստ ենք պայքարի տարբեր միջոցների: Հնարավոր են և հանրահավաքներ, և արտահերթ նիստ ԱԺ-ում, որի համար հիմա ստորագրահավաք է: Այսինքն՝ մենք ունենք գործողությունների մեր պլանը և կօգտագործենք քաղաքական պայքարի տարբեր մոթոդներ: Մենք մշտապես ակտիվ ենք եղել և կլինենք»,- ասաց Շահգելդյանը՝ հավելելով, որ ամեն դեպքում որոշ հարցերի շուրջ քառյակի հետ արդեն իսկ որոշակի համագործակցություն կա:
Ինչ վերաբերում է քառյակի կողմից առաջարկվող 12 կետերի վերաբերյալ ՕԵԿ-ի դիրքորոշմանը, ապա, Շահգելդյանի խոսքով, ՕԵԿ-ը մինչ քառյակի կողմից այդ կետերի առաջ քաշելն է դրանցից մի քանիսի վերաբերյալ օրենսդրական նախաձեռնություններ առաջ քաշել: «Սա քաղաքական պրոցես է, որում մենք ունենք մեր մոտեցումը»,-եզրափակեց Շահգելդյանը:
