ՀԱԿ մամուլի խոսնակ Արման Մուսինյանը, այսօր անդրադառնալով առաջիկա ներքաղաքական զարգացումներին, նշեց, որ քաղաքական գործընթացները մտել են ակտիվ շրջան, վաղը քառյակի ուժերը որոշում կկայացնեն և կհրապարակեն հանրահավաքի օրը:
Նրա խոսքով՝ ոչիշխանական քաղաքական ուժերը և այս իշխանության դեմ ուժերը, այդ թվում՝ հասարակության գերակշիռ հատվածը, քաղաքական աշուն է մտնում քաղաքական առումով մարտականորեն տրամադրված, իսկ իշխանությունը՝ առավել թուլացած: Սերժ Սարգսյանի վարչախումբը, ըստ նրա, երկիրը բարեկարգելու որևէ դեղամիջոց չունի և չի էլ ցանկանում առաջարկել դեղամիջոց, ունի մեկ նպատակ՝ իր իշխանության վերարտադրման դիրքերն ամրապնդելու, ինչի համար առաջ է քաշել սահմանադրական բարեփոխումները:
Նա նշեց, որ Հայաստանում առկա ցանկացած պրոբլեմ, որը հասարակության ուշադրության կենտրոնում է, պայմանավորված չէ առկա սահմանադրությամբ: Բացի դրանից՝ այս պրոյեկտի հիմնական նպատակը ոչ թե քաղաքական համակարգի առողջացումն է, այլ Սերժ Սարգսյանի վերարտադրության խնդիրը լուծելու, քանի որ Սահմանադրությունը արգելում է երրորդ անգամ նախագահի աթոռին նստել: Նրա խոսքով՝ գործող Սահմանադրությունը, ըստ էության, ամենալավ միջոցն է Սերժ Սարգսյանի վարչախմբի դեմ պայքարելու համար:
«Սերժ Սարգսյանը նշում է, որ ինքը դեմ է խորհրդարանական համակարգին, բայց իր ամբողջ թիմը, չգիտեք ինչու, թևերը քշտած, ուզում է բարեփոխել Սահմանադրությունը: Վստահ եմ, որ Սերժ Սարգսյանի այս ծրագիրը ձախողվելու է, նա չի կարողանալու անցկացնել «սահմանադրական բարեփոխումներ» կոչվածը»,- ասաց Արման Մուսինյանը՝ հավելելով, որ դրա համար, այդ թվում և՛ կառավարության գործունեության ձախողումը, արտաքին քաղաքականության ոլորտում խայտառակ անհաջողությունները և տապալումը, Սերժ Սարգսյանին ստիպելու են հեռանալ քաղաքական ասպարեզից:
Սերժ Սարգսյանի երազանքը, նրա դիտարկմամբ՝ քառյակում խնդիրներ առաջացնելն ու պառակտելը, կմնա միայն երազ:
«Այդ պրոյեկտը, որը ներկայացրել է Սերժ Սարգսյանը, թույլ է տալու նրան իշխանությունը պահել իր ձեռքում: Սա նրանք չեն էլ թաքցնում: Այս պրոյեկտի իրականացումը կլինի Հայաստանի վերջը: Քանի որ մենք վերջին տարիներին տեսել ենք Սերժ Սարգսյանի վարած քաղաքականությունը, այս ծրագիրը կյանքի չի կոչվելու, դա բացառված է»,- հավելեց նա:
Լուսանկարը՝ Pan Photo-ի