Քիչ առաջ ավարտվեց Հայաստանի հանրապետական կուսակցության խորհրդի նիստը: Դրանից առաջ տեղի էր ունեցել կուսակցության գործադիր մարմնի նիստ: Երկուսն էլ վարել է ՀՀ նախագահ Սերժ Սարգսյանը:
Ինչպես նիստից հետո լրագրողների հետ զրույցում ասաց ՀՀԿ խոսնակ Էդուրադ Շարմազանովը, խորհրդի նիստի ընթացքում Սերժ Սարգսյանը, ինչպես նաև կուսակցության փոխնախագահներ Արմեն Աշոտյանը, Հովիկ Աբրահամյանը, պատգամավորներ Մարգարիտ Եսայանը, Կարեն Ավագյանը, անձամբ ինքը՝ Շարմազանովը, հանդես են եկել ելույթներով:
Սերժ Սարգսյանը կարևորել է սահմանադրական բարեփոխումների հարցը: Նա նշել է, որ Հայաստանի Հանրապետության պատմության մեջ առաջին անգամ է, երբ հրապարակային բաց քննարկումներ ենք իրականացնում սահմանադրական բարեփոխումների վերաբերյալ. «Այսօր ոչ թե պատրաստի հայեցակայգ է հրամցվում, այլ քննարկվում է, հոկտեմբերին պատրաստ կլինի հայեցակարգը, և այն ակտիվ կքննարկվի թե՛ խորհրդարանական, թե՛ արտախորհրդարնական ուժերի հետ. «Մեզ զարմացնում է այն ուժերի տեսակետը, երբ ասում են՝ ժամանակը չէ սահմանդրական բարեփոխումներ իրականացնել: Նախագահական ընտրություններից առաջ գոռում-գոչում էին, որ անհրաժեշտ է անցնել խորհրդարանական կառավարման համակարգի, իսկ հիմա ո՞չ: Միայն դաշնակցության տեսակետն է ընդունելի, որ ուզում են խորհրդարանական համակարգ և ասում՝ եկեք քննարկենք, տեսնենք: Իսկ մնացած ուժերի արածը, որ դեռ հայեցակարգը չեղած ասում են՝ դեմ ենք՝ մեր ժողովրդական լեզվով ասած «մահանա» է:
Էդուարդ Շարմազանովն ընդգծեց նաև, որ նիստերի ընթացքում անդրադարձ է կատարվել հայ-թուրքական հարաբերություններին, ղարաբաղյան հակամարտության կարգավորմանը: Ներկայացվել են ՆԱՏՕ-ի գագաթնաժողովի արդյունքները:
«Մեր գնահատականը ՆԱՏՕ-ի գագաթնաժողովի վերաբերյալ հետևյալն է՝ մեր մասնակցությունը արդարացված էր և չափազանց կարևոր: Գիտեք, որ մինչ այդ Բաքվում հանդիպել են Էրդողանն ու Ալիևը: Այդ հանդիպման ընթացքում էրդողանը պատրաստակամություն էր հայտնել ՆԱՏՕ-ի գագաթնաժողովի ընթացքում ադրբեջանական խնդիրներ բարձրացնել՝ ասելով, որ մինչև Ղարաբաղի հարցը չլուծվի, հայ-թուրքական սահմանը չի բացվի»:
Նա կարևորեց նաև այն հանգամանքը, որ հռչակագրում հստակ ասվում է, որ Մինսկի խմբի համանախագահության ձևաչափը չպետք է փոխվի, և խաղաղ կարգավորումն այլընտրանք չունի. «Կարևոր էր նաև Սերժ Սարգսյանի ելույթն այդ ամբիոնից, որտեղից նա Ադրբեջանը ներկայացրեց որպես բռնապետական երկիր: Իսկ Ադրբեջանի ղեկավարը նման բաներից սովորաբար խոսում է Բաքվում և ոչ մեր ներկայությամբ: Բացի այդ, ՀՀ նախագահը Թուրքիան ներկայացրեց որպես Ադրբեջանի շահերի պաշտպան»:
Շարմազանովն ընդգծեց, որ այս ամենից կարելի է եզրակացնել, որ ադրբեջանաթուրքական գործարքը չիրականցավ, և նրանց ցանկությունը՝ փոխել Մինսկի խմբի ձևաչափը, ևս իրականություն չի դառնա»:
ՀՀԿ խոսնակն ընդգծեց նաև, որ ո՛չ խորհրդի, ո՛չ էլ գործադիր մարմնի նիստերում Սյունիքի մարզպետի հարցը չի քննարկվել:
Լուսանկարը՝ Photolure-ի
