Մեր զրուցակիցն է ԱԺ նախագահ Գալուստ Սահակյանը:
– Պարոն Սահակյան, նախկին նախագահ Ռոբերտ Քոչարյանը վերադառնում է, չե՞ք վախենում:
– Մեր վախը վաղուց բռնված է, ոչնչից չենք վախենում: Առավել ևս` և՛ առաջին, և՛ երկրորդ նախագահների դեպքերում: Եվ երբ ինչ-որ նոր մոտեցումներ են ձևավորվում, բնականաբար պատասխանում ենք: Իսկ եթե նորից ամեն ինչ կրկնվում է, չեմ կարծում որ, հարգանքից ելնելով, կարելի է արձագանքել, թեպետ ինչ-որ չափով արդեն արձագանքել ենք:
– Ձեր կարծիքով` Ռոբերտ Քոչարյանը 2018թ. նորից նախագահ դառնալու հնարավորություն ունի՞:
– Չեմ կարող ասել, որովհետև մեզանում 2018թ. համար որևէ քննարկումներ չկան:
– Իսկ հնարավո՞ր է, որ Քոչարյանը նորից լինի Հանրապետական կուսակցության թեկնածուն: Չէ՞ որ մի անգամ արդեն եղել է:
– Դա մեր քննարկումներից կարելի է… որովհետև քաղաքական պրոցեսներն այնպիսին են, որ ոչինչ չի կարելի մերժել: Բայց այս պահին այդ խնդիրը բոլորովին չկա, որովհետև ՀՀԿ-ն միշտ իր թեկնածուն ունի, իր ձևավորված մոտեցումներն ունի, այնպես որ` այսօր դա քննարկելը անհեթեթություն եմ համարում: Մասնավորապես այս պահին նաև առաջարկը չկա:
– Նկատի ունեք Ռ. Քոչարյանի՞ առաջարկը չկա:
– Իհարկե:
– Առաջին անգամ էր, որ Ռ. Քոչարյանն իր հարցազրույցում խոսեց քաղաքականություն վերադառնալու մասին՝ դա պայմանավորելով հանգամանքներով:
– Ես դա չեմ համարում լրագրողական հարցազրույց, որովհետև չկա միջազգային պրակտիկայում, երբ լրագրողը հերթականությամբ մի ամբողջ ժամանակաշրջան է նկարագրում և հետո հարց է ուղղում՝ արդեն երկրորդ նախագահի համար պատասխանի հնարավորություն չտալով: Կարելի է վերլուծել, որ երևի թե սքողված ինչ-որ մի բան կար, բայց ուղիղ՝ որպես քաղաքական դաշտին առաջարկ, նման մոտեցում չեմ տեսել ոչ հարցազրույցում, ոչ էլ իր համար նկարահանված ֆիլմում:
– Եթե Ռ. Քոչարյանն, այնուամենայնիվ, վերադառնա ակտիվ քաղաքականություն, Հանրապետական կուսակցության համար կդառնա գործընկե՞ր, թե՞ մրցակից:
– Մեզ համար բոլորը և գործընկեր են, և մրցակից:
– Բայց Դուք ո՞ր դերում կցանկանայիք նրան տեսնել` գործընկերո՞ջ, թե՞ մրցակցի:
– Նախ ասեմ, որ քաղաքական իրողություններում տեսնելու խնդիր չկա, քննարկելու, մոտեցումներ ձևավորելու խնդիր կա: Այսօր նման մոտեցումներ չեն ձևավորվել:
– Այսինքն` նրա վերջին հարցազրույցը ՀՀԿ-ում չի՞ քննարկվել:
– Չի էլ կարող քննարկվել, որովհետև քննարկման պահը քաղաքական ժամանակաշրջանն ինքն է պարտադրում: Քաղաքականության մեջ երբևիցե հավերժական մրցակիցներ ու բարեկամներ չեն լինում: Այս պահին որևէ նման խնդիր չկա, և ես չեմ կարծում, որ սա հենց այն պահն է, որ Հանրապետականը պետք է քննարկի, թե 2018թ. ինչ պիտի լինի: Մասնավորապես` եթե կառավարման մոդելի փոփոխություններ լինեն, քննարկումներն այլ ուղղությամբ կգնան:
Լրագրողների հետ Գ. Սահակյանի հարցուպատասխանն ամբողջությամբ կարող եք դիտել տեսանյութում, որտեղ նա անդրադառնում է նաև Դաշնակցություն կուսակցությանը ոչ իշխանական քառյակից պոկելու, սահմանադրական փոփոխություններին վերաբերող թեմաներին:
