Վրաստանի հյուսիսատլանտյան ինտեգրման կողմնակիցներն ու ընդդիմադիրները սեպտեմբերի 3-ին երկու ակցիա են անցկացրել Թբիլիսիում ԱՄՆ դեսպանատան մոտ: Այս մասին հայտնում է «Նովոստի գրուզիան»:
Սեպտեմբերի 4-5-ը Մեծ Բրիտանիայում տեղի կունենա ՆԱՏՕ-ի գագաթնաժողովը, որում կներկայանա նաև Վրաստանը: Ավելի վաղ ՆԱՏՕ-ի գլխավոր քարտուղար Անդերս Ֆոգ Ռասմուսենը հայտարարել էր, որ դաշինքի հետ Վրաստանի մտերմանալը կարող է վերաբերել Վրաստանի տարածքում համատեղ զորավարժություններին, նաև այնտեղ ռազմական ուսումնական կենտրոնի ստեղծմանը:
«ՆԱՏՕ-ին և Եվրոպային Վրաստանի մոտենալու կողմնակիցները չորեքշաբթի օրը հավաքվել են ԱՄՆ դեսպանատան շենքի մոտ: «Ոչ ՆԱՏՕ-ին» ակցիայի մասին տեղեկացվել էր դեռ օգոստոսի կեսին»,- հայտնում է գործակալությունը:
Մոտ 50 մարդ նշանակված ակցիայից կես ժամ առաջ գնացել է դեսպանատան շենքի մոտ այն խափանելու համար: Պատահարներից խուսափելու համար «Ո՛չ ՆԱՏՕ-ին» ակցիայի կազմակերպիչ՝ «Եվրասիական ընտրություն-Վրաստան» ոչկառավարական կազմակերպությունների կոալիցիայի ներկայացուցիչները, ևս մոտ 50 հոգի ակցիան տեղափոխել են «Գուդվիլ» առևտրի կենտրոնի մոտ, որը գտնվում է ԱՄՆ դեսպանատնից մի քանի հարյուր մետր հեռու: Մոտ 20 րոպե տևած ակցիային նրանք բերել են «Ո՛չ ՆԱՏՕ-ին: Ո՛չ պատերազմին» գրությամբ պաստառներ, նաև մեծ լուսանկարներ Իրաքում, Սիրիայում, Սերբիայում, Աֆղանստանում ՆԱՏՕ-ի գործողություններից:
Հակառակ ակցիայի մասնակիցները ԱՄՆ և Վրաստանի դրոշներով մի քանի անգամ փորձել են մոտենալ «Եվրասիական ընտրության» անդամներին, բայց ոստիկանությունը խանգարել է նրանց:
