Կրթության ազգային ինստիտուտի փոխտնօրեն Անահիտ Բախշյանը, ով ներկա էր քաղաքապետարանի ենթակայության դպրոցների ուսուցիչների ամենամյա օգոստոսյան խորհրդակցությանը, «Առաջին լրատվական»-ի հետ զրույցում անդրադարձավ ուսումնական տարվա խնդիրներին՝ նշելով, որ խնդիրները շատ են, նա նշեց, որ երեխայի սովորելու ցանկությունը առաջինը չէ. երեխան նախ ուզում է լինել շրջապատված, հոգատար ընտանիքում մեծանալ, սոցիալապես ապահով և կուշտ լինել. այդ բոլոր պայմանները ապահովելուց հետո երեխան նոր ուզում է սովորել:
«Մինչդեռ Մանուկ Մկրտչյանը այսօր ասաց, որ կրթության որակը չեն գնահատում՝ ընտրելով տաք դպրոցը: Մեր՝ կրթության ոլորտի աշխատողներիս խնդիրը կրթություն ապահովելն է, հետևաբար մեզ տվեք տաք ապահով դպրոցներ, նոր պահանջեք որակ»,- ասաց Անահիրտ Բախշյանը:
Անդրադառնալով հարցին՝ ո՞ր դպրոցներն են նախընտրում ծնողները, արդյո՞ք վարկանիշային և կոռումպացված դպրոցներն են առաջին տեղերում, Անահիտ Բախշյանը նշեց, որ կոռուպցիան ամեն տեղ կա, նաև դպրոցներում:
«Կոռուպցիան ժանգ է, ցեց, որ ուտում է մեր պետությունը, հետևաբար որևէ ծնող, երբ սկսում է քննարկել, թե ո՞ր դպրոցը տանի, կախված նրանից՝ ինչպիսին է իր սոցիալական վիճակը, դրան համապատասխան դպրոց գտնում է: Եթե ինքը քաղքենի է, եթե ինքը ունևոր է, եթե ինքը շրջապատ ունի, ուրեմն կան դպրոցներ, որոնք իրենց համար են, բայց ծնող կա, որ իսկապես մտահոգ է, և փնտրում է դպրոց, որտեղ իր երեխան կկայանա, ապահով կլինի ամեն տեսակետից, գիտելիքներով կհարստանա, անհատականությունը երեխայի կբացվի, այդպիսի ծնողները շատ են, ովքեր փնտրում են այդպիսի դպրոցներ»,- նշեց Անահիտ Բախշյանը՝ հավելելով, որ երեկ Սերժ Սարգսյանը ընդունեց միջազգային օլիմպիադաներում հաղթած երեխաներին, մեր երեխաները պայծառ են, հպարտանում ենք նրանցով. «Պատկերացրեք՝ եթե ՀՀ բոլոր մյուս դպրոցները բերվեն նույն մակարդակի, եթե ուսուցիչներն իրենց տեղում լինեն, ապա դրանց թիվը ոչ թե 19, այլ շատ կլիներ»:
Անահիտ Բախշյանի դիտարկմամբ՝ եթե մենք կրթությունը դիտենք պետական անվտանգության հիմնաքար, մենք կունենանք և՛ լավ զինվոր, և՛ լավ գիտնական, և՛ կառավարության մեջ կլինեն մարդիկ, ովքեր բանակում ծառայել են, բանակում ծառայած մարդն ինքն իր բաժին սահմանն է պահում:
«Հայրենասիրական դաստիարակության հայեցակարգ է մշակվելու, բոլորովին չեմ հասկանում, թե Երկրապահից ով պետք է հայեցակարգի մեջ իր լուման ունենա կրթության տեսակետից, բայց դրա կարիքը չկա, պետք է կառավարությունը լինի հայրենասեր, նախարարները, նախագահները, վարչապետը պետք է լինեն հայրենասեր, ՀՀ ցանկացած գյուղացի, ՀՀ ցանկացած քաղաքացի, երեխա պետք է տեսնի հայրենասիրությունը, և այդ հայրենասիրությունը բոլոր առարկաների վեկտորներով պետք է մտնի մարդու մեջ»,- ասաց նա:
Ավելին՝ տեսանյութում:
