Թուրքական Anadolu լրատվական գործակալության փոխանցմամբ՝ Թուրքիայում հերթական անգամ ձվահարել են մշակույթի և զբոսաշրջության նախարար Էրթուղրուլ Գյունային: Այս անգամ միջադեպը գրանցվել է Հաջեթեփեի համալսարանի մշակութային կենտրոնում կազմակերպված համերգի ժամանակ, որը նվիրված է եղել թուրք-ադրբեջանական բարեկամությանը:
Այդ համերգին մասնակցել են նաև Ադրբեջանի փոխվարչապետ Էլչին Էֆենդիևը, Ադրբեջանի մշակույթի ու զբոսաշրջության նախարար Աբուլֆաս Գարաևը, Ադրբեջանի կրթության նախարար Միսիր Մարդանովը և Թուրքիայում Ադրբեջանի դեսպան Ֆաիկ Բագիրովը:
Էրթուղրուլ Գյունային համերգի ժամանակ ձվահարել են «Ուսանողական կոլեկտիվներ» կազմակերպության անդամները: Ոստիկանության աշխատակիցները և նախարարի թիկնազորը ձվահարողներին դուրս են բերել դահլիճից և ձերբակալել: Համերգը նվիրված է եղել Ադրբեջանի նախկին նախագահ Հեյդար Ալիևի մահվան 9-րդ տարելիցին:
