Աշխարհի խոշորագույն Google որոնողական պորտալում 2012 թվականին ի՞նչ է ամենից շատ փնտրել աշխարհը: Ինտերնետ հսկան ներկայացնում է 2012-ի ամփոփումը տեսանյութով: Համաձայն ամփոփոիչ տվյալների՝ անցնող տարում համակարգում իրականացվել է 146 լեզուներով 1.2 տրիլիոն հարցում:
Ինտերնետ որոնման այս տարվա թրենդներն են Ուիթնի Հյուսթոնի մահը, հարավկորեացի ռեփեր PSY-ի Gangam Style հիթը, որը YouTube վիդեոհոսթինգի պատմության մեջ ամենադիտված տեսանյութն է, և «Սենդի» փոթորիկը: Վերջինս առաջատար է նաև «Իրադարձություն» կատեգորիայում:
«Սպորտ» կատեգորիայում ամենից շատ փնտրվել են Լոնդոնյան ամառային Օլիմպիադան և 2012-ի Ֆուտբոլի Եվրոպայի առաջնության խաղերը: Իսկ ամենափնտրված մարզիկները եղել են Ջերեմի Լինն ու Մայքլ Ֆելպսը:
Ինտերնետ հսկան ամփոփել է նաև «ինչպե՞ս» հարցով սկսվող հարցումները: Առաջին տեղում է «ինչպե՞ս բարի դառնալ» արտահայտությունը: Օգտատերերին հետաքրքրել է նաև, թե ինչպե՞ս մաքրել արծաթը և դիտել ընտրությունները: Քիչ չեն եղել նաև «Ի՞նչ է սերը» հարցման Google-ի արդյունքներով հետաքրքրվողները:
