Ֆրանսիայում քաղաքական ճգնաժամը` Մանուել Վալսի կառավարության հրաժարականը, արտացոլում է եվրոգոտու խնդիրները: Նման կարծիքի է Financial Times պարբերականը:
«Երկրի ՀՆԱ տվյալների հրապարակումից հետո պարզ դարձավ, որ ֆրանսիացի սոցիալիստների համար նոր քաղաքական սեզոնը շատ բարդ կլինի»,- նշում է պարբերականը:
Բանն այն է, որ երկրի էկոնոմիկայի նախարար Առնո Մոնթեբուրը քննադատել է գործող տնտեսական ուղղությունը` կոչ անելով փոխել այն: Ֆրանսիայի նախագահ Ֆրանսուա Օլանդը, սակայն, որոշեց փոխել կառավարությունը:
Պարբերականը նշում է, որ վերջին իրադարձությունները «ոչ այլ ինչ են, քան խորտակվող նավում աթոռների տեղափոխություն»: Ճգնաժամը հրահրող Մոնթեբուրը մի շարք չմտածված հայտարարություններ է արել, ասվում է պարբերականում:
«Կկարողանա՞ արդյոք եվրոգոտին երբևէ վերականգնվել բյուջետային ծախսերի կրճատման և գումարա-վարկային քաղաքականության ներկայիս պայմաններում, որը զգալիորեն կոշտ օրենսդրական սահմանափակումներով ազդում է Եվրոպական կենտրոնական բանկի գործունեության վրա»,- գրում է թերթը: Այս խնդիրները մատնացույց է արել ԵԿԲ ղեկավար Մարիո Դրագին:
«Տնտեսության ոլորտում ֆրանսիացի սոցիալիստների բանավեճերը ոչ միայն 2017-ի նախագահական ընտրությունների շեմին դիրքերն ամրապնդելու պայքար են: Կառավարությունը գիտակցում է, որ տնտեսական աճի բացակայության պայմաններում ինքն ի վիճակի չի լինի հասնել բյուջեի հետ կապված նպատակներին, իր գրաֆիկից հետ կմնա երկու տարով, և Եվրահանձնաժողովի կողմից հերթական աջակցության կարիքը կունենա»,- ամփոփում է պարբերականը:
