Թուրքիան պատրաստվում է ավելացնել դեպի Ռուսաստան արտահանման ծավալները, հաղորդում է The Wall Street Journal-ը:
Պարբերականի տվյալներով՝ խոսքը մրգերի, բանջարեղենի և կաթնամթերքի արտահանման մասին է:
«Թուրքիան Ռուսաստանի պես էներգետիկ ռեսուրսներ չունի, սակայն կա գյուղատնտեսություն, ջուր: Մենք պետք է աշխատենք նրանց հետ և վաճառենք մեր արտադրանքը»,-ասել է Ստամբուլի առևտրի պալատի ներկայացուցիչ Ահմեդ Օզերը:
Ինչպես նշում է պարբերականը՝ դեպի Ռուսաստան թուրքական արտահանման ծավալների ավելացումը Անկարային հնարավորություն կտա կրճատել առևտրային բալանսի դեֆիցիտը և կօգնի վերականգնվել ԵՄ պահանջարկի կրճատումից, որը Թուրքիայի շուկայում ամենախոշորն է:
«Դա 100%-ով դրական նորություն է, մենք պետք է օգտագործենք այդ հնարավորությունը: Ռուսաստանը կուլ կտա այն ամենը, ինչ մենք արտադրում ենք»,- նշել է Օզերը:
Պարբերականի տվյալներով՝ Թուրքիան անցած տարի Ռուսաստանին 7 միլիարդ դոլարի ապրանք է վաճառել: Օզերի խոսքով՝ այդ ցուցանիշը կարող է աճել 25%-ով, եթե Մոսկվան Անկարային դիմի այն ապրանքների արտահանման հարցով, որոնք նախկինում ներկրվում էին Ավստրալիայից, Կանադայից, Նորվեգիայից, ԱՄՆ-ից և ԵՄ երկրներից:
Պարբերականը, սակայն, նշում է, որ դեպի Ռուսաստան արտահանման ծավալների մեծացումը բացասաբար կարող է անդրադառնալ Անկարայի և Բրյուսելի հարաբերությունների վրա: