HSBC բանկը վերադարձրել է մոտ 43 հազար դոլար, որոնք գողացվել էին մարտի 8-ի երեկոյան անհետացած մալայզիական Boeing-ի 3 ուղևորների և անձնակազմի մեկ անդամի հաշիվներից ՝ հաղորդում է New Straits Times թերթը:
Փողերը հաշիվներին վերադարձվել է ուրբաթ: Ինչպես հաղորդում է պարբերականը, հղում կատարելով Malay Mail Online News-ին, գողության մեջ կասկածվում է բանկի աշխատակիցներից մեկը, ինչպես նաև մի հանցախումբ: Թալանված հաշիվները պատկանել են Մալայզիայի և Չինաստանի երկուական քաղաքացիների:
«Մենք շատ լրջորեն զբաղվում ենք հաճախորդների հաշիվների անվտանգության հարցով, հիմա հավելյալ միջոցներ են ձեռք առնվում, որպեսզի նման դեպք այլևս չկրկնվի»,- հայտարարել է HSBC–ի հասարակական կապերի պատասխանատու Մարլին Կաուրը:
Boeing-ը չվերթ է իրականացրել Կուալա Լումպուրից Պեկին՝ 227 ուղևորներով և անձնակազմի 12 անդամներով ու անհետացել է:
Մալայզիայի վարչապետը հայտարարել է, որ օդանավն ընկել է Հնդկական օվկիանոսի հարավային հատվածում: Այդ մասին վկայում են արբանյակների տվյալները: Ենթադրաբար, ոչ ոք ողջ չի մնացել:
