Չինաստանի Կունշան քաղաքում բացվել է ռեստորան, որտեղ հաճախորդներին սպասարկում են ռոբոտները: Այնտեղ տասնյակից ավելի մեխանիկական մատուցող է աշխատում: Ավելին՝ այնտեղ ուտելիքը ևս ռոբոտներն են պատրաստում՝ հայտնում է NewsAsia-ն:
Ռեստորանի տեր Սոն Յուհանը պատմում է. «Աղջիկս չի սիրում տնային գործեր կատարել, ուստի նա ինձ խնդրեց ռոբոտ պատրաստել»: Ռոբոտներից երկուսը խորտկարանի հաճախորդներին դիմավորում են մուտքի մոտ, 4-ն էլ ուտեստներով սայլակները տանում են դեպի սեղանները: Նրանք գնում են նախանշված ճանապարհով և մարդկանց խնդրում զիջել ճանապարհը, եթե վերջիններս հանդիպում են իրենց ճանապարհին: Խոհանոցում աշխատում է 3 ռոբոտ-խոհարար:
Հաստատության տիրոջ խոսքով՝ ռոբոտները հասկանում են մինչև 40 պարզ առաջադրանք: «Նրանք հանգստյան օր չեն խնդրում, չեն հիվանդանում, նրանց ընդամենը 2 ժամ լիցքավորվել է պետք, որից հետո աշխատում են 5 ժամ»,- ասում է նա:
Տեղի ԶԼՄ-ների հաղորդմամբ՝ յուրաքանչյուր ռոբոտն արժե ավելի քան 6 հազար դոլար:
