«Աստղային պատերազմներ» ֆիլմի յոթերորդ մասի նկարահանումները կվերսկսվեն արդեն այս ամիս, երեքշաբթի հաղորդել է Hollywood Reporter պարբերականը:
Հունիսին հաղորդվել էր, որ նոր ֆիլմի աշխատանքները դադարեցվել են հոլիվուդյան դերասան Հարիսոն Ֆորդի վնասվածքի պատճառով, որը նա ստացել է լոնդոնյան նկարահանման հրապարակում: Նա ձախ ոտքի վիրահատության է ենթարկվել:
Ինչպես գրում է պարբերականը՝ «Անորսալիները 3» ֆիլմի պրեմիերային Ֆորդի հայտնվելը առիթ է տվել մտածելու, որ նա շուտով կարող է վերադառնալ «Աստղային պատերազմների» նկարահանումներին: Ինչևէ, պարբերականի աղբյուրը չի կարողացել հաստատել՝ արդյոք Ֆորդը նկարահանումների համար Լոնդոն կվերադառնա՞, թե՞ ոչ:
«Աստղային պատերազմների» յոթերորդ մասի թողարկումը ծրագրված է 2015թ. դեկտեմբերի 18-ին: Այս ֆիլմի իրադարձությունները կզարգանան 1983թ. նկարահանված «Ջեդայի վերադարձից» 30 տարի անց: Հայտնի է, որ սյուժեի կենտրոնում կլինեն օրիգինալ պատմության կերպարները՝ Լյուք Սքայոուքերը, արքայադուստր Լեան և Հան Սոլոն:
