Դերասան Ռոբին Ուիլյամսը մահվանից առաջ՝ վերջին օրերին ոչ ոքի հետ չի շփվել և տառապել է ընկճախտով: Այս մասին հայտնում է The Sun թերթը՝ հղում անելով դերասանին մոտ աղբյուրին:
Ռոբին Ուիլյամսը մահացել է 64 տարեկանում, ենթադրաբար՝ նա ինքնասպան է եղել:
Ուիլյամսին վերջին անգամ տեսել են երկուշաբթի օրը՝ Երևանի ժամանակով ժամը 9:00-ին մոտ: Դերասանը վերջերս էր դուրս եկել վերականգնողական կենտրոնից, որտեղ հերթական անգամ բուժվել է 1980-ականներին ալկոհոլի և թմրանյութերի գերդոզավորման հետևանքով առաջացած ընկճախտից:
«Նա դարձել էր շատ մեկուսի, և քչերն էին կարողանում մոտենալ նրան… Նա վերականգնողական կենտրոնից հետո փակվեց տանը»,- թերթին հայտնել է դերասանի ընկերը:
Դերասանը նաև ֆինանսական խնդիրներ է ունեցել 2 ամուսնալուծություններից հետո: Մահվանից ոչ շատ առաջ նա փորձել է վաճառել Կալիֆոռնիայի իր 20 մլն դոլար արժողությամբ առանձնատունը: Ֆինանսական խնդիրների պատճառով նա համաձայնվել է մասնակցել «Խենթերը» (The Crazy Ones) նախագծին, որը տապալվեց ու մեկ սեզոնից հետո փակվեց: Նկարահանման հրապարակում աղբյուրները ևս հայտնում են, որ դերասանի համար դժվար է եղել շփվել գործընկերների հետ:
