Ռուսական «Վեդոմոստի» թերթը, հղում անելով բարձրաստիճան դաշնային պաշտոնյաներին և այլ աղբյուրների, տեղեկացնում է, որ ռուս պաշտոնյաները քննարկում են Եվրոպայից Ասիա Ռուսաստանի տարածքով եվրոպական ավիաընկերությունների տրանզիտային թռիչքների սահմանափակման կամ արգելքի հարցը: Ռուսաստանցի պաշտոնյաների մոտ այդ մտադրությունն առաջացել է Արևմուտքի կողմից Ռուսաստանի նկատմամբ կիրառված վերջին պատժամիջոցներից հետո, երբ Ռուսաստանի խոշորագույն բանկերը ներառվեցին պատժամիջոցների ցանկում:
Ըստ «Վեդոմոստի»-ի՝ ներկայում խորհրդակցություններ են ընթանում Տրանսպորտի նախարարության և ԱԳՆ մակարդակով, իսկ որոշումը պետք է ընդունի կառավարությունը: Ռուսաստանը նման քայլերով փորձում է ցույց տալ, որ ինքը կարող է «հակահարված» հասցնել ԵՄ-ին՝ անպատասխան չթողնելով ոչ մի պատժամիջոց:
Հայաստանի քաղավիացիայի վարչության նախկին պետ Շահեն Պետրոսյանի կարծիքով՝ Ռուսաստանը նախ չի գնա այդ քայլին և իրեն չի զրկի եկամուտներից: Այդ ամենն ընդամենը հոխորտանք է, ոչինչ չասող սպառնալիք: Իսկ եթե անգամ գնա նման քայլի, ապա ընդհանրապես կմեկուսանա:
Պետրոսյանից հետաքրքրվեցինք՝ եթե Ռուսաստանն ամեն դեպքում փակի իր օդային տարածքը Եվրոպայի համար, դրանից ի՞նչ օգուտներ կարող է ստանալ Հայաստանը: Մեր զրուցակցի խոսքով՝ Հայաստանի համար, բնականաբար, օգուտ կլինի ստեղծված վիճակը, սակայն, եթե Ռուսաստանը գնա նման քայլերի, Հայաստանին էլ կպարտադրի փակել իր օդային տարածքը: «Իսկ քանի դեռ մենք ունենք նման անողնաշար իշխանություն, ապա նրանք կանեն այն, ինչ իրենց կթելադրի Ռուսաստանը»:
«Հայաստանին, բնականաբար, օգուտ կլինի, բայց իմ կարծիքով՝ ավելի օգուտ կլինի Վրաստանի համար, քանի որ Եվրոպայից դեպի արևելք գնացող բոլոր օդանավերը կանցնեն Ուկրաինայի օդային տարածքով, ապա կմտնեն Վրաստանի օդային տարածք և Ադրբեջանով կգնան: Հայաստանի դեպքում ընդամենը մի քանի թռիչք կարող է ավելանա դեպի հարավ՝ Իրան, Արաբական Էմիրություններ և մի քանի այլ երկրներ: Այնպես որ, եթե Ռուսաստանը փակի իր օդային տարածքը, ապա դա մեծ օգուտ կբերի հենց Վրաստանին և Ադրբեջանին»,- «Առաջին լրատվական»-ի հետ զրույցում ասաց քաղավիացիայի նախկին պետը՝ հավելելով, որ եթե Եվրոպան էլ իր հերթին փակի իր օդային տարածքը ռուսական ավիաընկերությունների համար, ապա Ռուսաստանը լրիվ կվերանա: Եթե կարողանա, ընդամենը մի քանի ներքին չվերթ կիրականացնի:
«Պատժամիջոցների արդյունքում մի ավիաընկերություն՝ «Դոբրոլյոտը» տուժեց, և արդեն իսկ ակնհայտ է, թե ինչ է կատարվում Ռուսաստանում: 17 հազար տուրիստներ չեն կարողանում վերադառնալ: Ընկերությունը սնանկացել է և որևէ գործարք չի կարողանում կատարել: Ավելին ասեմ՝ եթե միայն «Այրբաս»-ն ու «Բոինգ»-ը հրաժարվեն պահեստամասեր տրամադրել ռուսական ավիաընկերություններին, ապա նրանք լրիվ կկանգնեն փակուղու առաջ»,- ասաց Շահեն Պետրոսյանը:
Վերջինիս խոսքով՝ եթե անգամ Ռուսաստանը գնա նման քայլի, ապա Եվրոպան ավելի խիստ պատժամիջոց կարող է կիրառել: Մասնավորապես Արևմուտքը կարող է անջատել ռուսական ինտերնետը, որը կլինի Ռուսաստանի վերջը: «Ինտերնետը փակելուց հետո, իսկ Ամերիկան նման հնարավորություն ունի, Ռուսաստանը կհայտնվի ոչ թե միջնադարում, այլ քարե դարում: Պատկերացրեք, որ Ռուսաստանի ինտերնետը մի ժամով փակվի, ապա ոչ մի օդանավ, ոչ մի ուղևոր չի կարող տեղաշարժվել, տոմս գնել, ոչ մի գործարք չի կարող կատարվել, այսինքն՝ իսկական աղետ կլինի Ռուսաստանում: Սակայն Արևմուտքը դեռ չի ուզում ավելի կոշտ քայլերի գնալ: Իսկ այդ կոշտ քայլերի դեպքում գալու է Ռուսաստանի փլուզումը, որովհետև ինքը Սովետական Միության ավելի նեղացած մոդելն է, և տա Աստված, որ տեսնենք այդ օրը»,- նկատեց Պետրոսյանը: