Ամերիկյան իշխանությունները կարծում են, որ գոյություն ունի ևս մեկ աղբյուր, որի միջոցով մամուլ են ներթափանցում գաղտնի փաստաթղթեր: Այս մասին հայտնում է CNN-ը՝ հղում անելով ԱՄՆ վարչակազմի աղբյուրին:
Պաշտոնյաները նման եզրակացության են եկել՝ ուսումնասիրելով փաստաթուղթը, որը հրապարակվել է Intercept կայքում, որտեղ նախկինում զետեղվել են ԿՀՎ նախկին աշխատակից Էդվարդ Սնոուդենի տրամադրած տվյալները: Փաստաթուղթը, որին հղում է անում պարբերականը, պատրաստվել է Ահաբեկչության դեմ պայքարի ազգային կենտրոնի կողմից և թվագրվում է 2013-ի օգոստոսին: Այդ ժամանակ Սնոուդենն արդեն Ռուսաստանում է եղել:
Փաստաթղթում, որը կայքին տրամադրել է «հետախուզական հասարակության աղբյուրը», ասվում է, որ ահաբեկչական խմբավորումներին մասնակից լինելու մեջ կասկածվող անձանց ցուցակի 680 հազար անդամներից մոտ կեսն այնտեղ գտնվում է չարդարացված: «Նրանց մասնակցությունն ահաբեկչական խմբավորմանը հայտնաբերված չէ»,- ասվում է փաստաթղթում:
Իշխանությունները փորձում են պարզել, թե ով կարող էր լրագրողներին փոխանցել այդ գաղտնի փաստաթուղթը, որը կարևորություն է ներկայացնում ԱՄՆ ազգային անվտանգության համար:
Ավելի վաղ ԶԼՄ-ներն արդեն հայտնել էին ԱՄՆ Ազգային անվտանգության գործակալության կառույցներում նոր գաղտնազերծողի հնարավոր գոյության մասին:
