Մերձավոր Արևելքի և հյուսիսային Աֆրիկայի երկրներն առանձնապես խոցելի են կլիմայի անբարենպաստ փոփոխությունների, մասնավորապես` երաշտի և թարմ ջրի պակասի նկատմամբ, ասված է Համաշխարհային բանկի` ՄԱԿ-ի կլիմայի փոփոխության վերաբերյալ Կատարում ընթացող բանակցությունների ժամանակ ներկայացված հատուկ զեկույցում, հայտնում է RIANovosti-ն:
ԱՊԼ-ի հետ համատեղ անցկացրած հետազոտության տվյալներով` վերջին 30 տարիներին վտանգավոր եղանակային երևույթների և կլիմայական կատակլիզմների` տարածաշրջանին հասցրած վնասը կազմում է մոտ 12 մլրդ դոլար, դրանցից տուժածների թիվը հասնում է 50 մլն մարդու:
Զեկույցի տվյալներով` կլիմայի փոփոխության պատճառով չորային շրջաններում տեղումների քանակն ավելի կկրճատվի, սակայն դրա հետ մեկտեղ` տարածաշրջանում մեծանում է նաև ջրհեղեղների ռիսկը, այդ թվում` նաև հորդառատ անձրևներից առաջացած:
Կլիմայի փոփոխությունը հատկապես մեծ վնաս կարող է հասցնել տարածաշրջանի գյուղատնտեսությանը, որն ունի աշխարհի ամենաքիչ ջրային ռեսուրսները: Բերքատվության անկումն ու երաշտները հարվածի տակ կդնեն գյուղերի բնակչության կեսին, կմեծացնեն ուրբանիզացիայի միտումներն ու սպառնալիք կդառնան երկրների սննդի անվտանգությանը, որոնց մեծ մասն առանց այդ էլ ստիպված է մեծ քանակությամբ սնունդ ներմուծել: Կտուժի նաև զբոսաշրջության ոլորտը, որի տարեկան շրջանառությունը տարածաշրջանում հասնում է 50 մլրդ դոլարի:
Ներկայումս Կատարի մայրաքաղաքում տեղի է ունենում կլիմայի փոփոխության հարցով ՄԱԿ-ի կոնֆերանսը: Երկշաբաթյա բանակցությունների, որոնք սկսվել են նոյեմբերի 26-ին, գլխավոր թեմաներն են` Կիոտոյի արձանագրության պարտավորությունների երկրորդ շրջանի պայմաններն ու «Կանաչ կլիմայական հիմնադրամի համար դրամահավաք կազմակերպելու մեխանիզմները:
