Արյան քաղցկեղով հիվանդ 6-ամյա Նարեկ Մարտիրոսյանի կյանքը փրկելու համար «Դու հաստատ կապրես» կարգախոսի ներքո են միավորվել մարդիկ, որոնք երեխայի կյանքը փրկելու կոչն ավելի ազդու դարձնելու նպատակով ձայնագրել են «Դու հաստատ կապրես երգը» ու նկարահանել տեսահոլովակ, որի շնորհանդեսը կայացավ այսօր:
Լրագրողների հետ հանդիպմանը ներկա էր նաև տղայի հայրը, ով ներկայացրեց երեխայի հիվանդությունը. այն հայտնաբերվել է 2009թ.: Հիվանդությունն ախտահարել է երեխայի ոսկրածուծը, երեխան ստացել է քիմիաթերապիա, և ծնողներին ու բժիշկներին թվացել է, թե կարծես ամեն ինչ հաղթահարվել է, սակայն հիվանդությունը կրկնվել է: «Վերջերս նա իրեն վատ էր զգում, ու անալիզներ հանձնեցինք, բայց արդեն Մոսկվայում՝ իմանալու, թե ինչն է վատ զգալու պատճառը: Պարզվեց, որ հիվանդությունը կրկնվել է»,- ասաց Նարեկի հայրը:
Երեխայի կյանքը հնարավոր է փրկել միայն վիրահատության միջոցով, որն արվում է Եվրոպայում: «Ասում են՝ դա երեխայի կյանքը փրկելու միակ միջոցն է»,- հավելեց նա:
Գործիքավորող Դեր Հովանն էլ իր հերթին նշեց, որ մեծ սիրով է համաձայնել կատարել երգի գործիքավորումը: «Անիմաստ կլիներ, եթե ես չօգնեի: Իմ առաջին բարեգործական փորձն է: Մեծ հաճույքով արեցի: Ուզում եմ մեր ժողովրդին կոչ անել օգնելու Նարեկին: Մեծ հույս ունենք, որ մինչև Նոր տարի կհասնենք մեր նպատակին, ու Նարեկը կառողջանա»,- ասաց նա՝ հույս հայտնելով երեխային տեսնել ողջ-առողջ ու լավ մարդ դարձած:
Համացանցում արդեն տարածում գտած երգը կատարում է երգչուհի Էլիզաբեթ Ադիկյանը, երգի հեղինակը Տարոն Կոխլիկյանն է, գործիքավորումը` Դեր Հովանի: Երգն ստեղծվել է Վոլֆգանգ Ամադեուս Մոցարտի սիմֆոնիաներից մեկի հիման վրա, երգի գաղափարը Հռիփսիմե Հովհաննիսյանինն է:
Արտասահմանում նման բուժումն արժե 100-200 հազար եվրո: Նրան աջակցել ցանկացողները կարող են գումար փոխանցել հետևյալ հաշվեհամարներին` ՎՏԲ Հայաստան բանկ,
16076008837904;/ARM, 16076008837905/ USD, 16076008837906/EUR, 16076008837907/RUS:
