Քննչական կոմիտեի նախագահ Աղվան Հովսեփյանն արդեն կառավարության քննարկմանն է ներկայացրել Քննչական կոմիտեի և Քննչական կոմիտեի դեպարտամենտի կառուցվածքը, պաշտոնական անվանացանկը և հաստիքացուցակը, որը թերևս կհաստատվի կառավարության առաջիկա նիստում: Սակայն ինտրիգը շարունակում է մնալ Հովսեփյանի պոտենցիալ տեղակալների շուրջ, որոնց նշանակումը Սերժ Սարգսյանի իրավասությունների շրջանակում է: Իսկ մինչ այդ չեն դադարում շրջանառվել 4 հավանական տեղակալների անուններ՝ ոստիկանության քննչական գլխավոր վարչության պետ Գագիկ Համբարձումյան, Կորյուն Փիլոյան, Վահագն Հարությունյան, ՀԾՔ նախկին պետ Անդրանիկ Միրզոյան և այլն:
Ինքը՝ Անդրանիկ Միրզոյանը, «Առաջին լրատվական»-ի հետ զրույցում ասաց, որ իրեն նման առաջարկ չի արվել: Իսկ եթե արվի՝ կմտածի: Անդրանիկ Միրզոյանի խոսքերով՝ քննչական կոմիտեն այս տեսքով թերի կառույց է: Ճիշտ կլիներ, որ բոլոր կառույցների քննչական մարմինները միանային: «Ճիշտ կլիներ, որ բոլոր քննչականները միավորվեին: Կարծում եմ, որ դա ժամանակի հարց է: Թե չէ, ինչի է նման, երբ ոստիկանության քննիչը ենթարկվում է ոստիկանության պետին: Չի կարելի այդպես, ըստ էության: Այդ վիճակը հիման շարունակելու է մնալ ԱԱԾ-ում, ՊԵԿ-ում: Բայց դրանք ևս պետք է միավորվեն քննչականում: Դա միանշանակ է: Քննչական մեկ կառույց պետք է լինի, ինչպես աշխարհի մի շարք երկրներում»,- կարծում է Միզոյանը:
Հարցին ի պատասխան, թե իր կարծիքով այս նորաստեղծ կառույցը այս տեսքով, որը գլխավորում է Աղվան Հովսփյանը. կգործի՞, կծառայի՞ այն նպատակին, ինչի համար ի սկզբանե ստեղծվել է, Միրզոյանը նկատեց. «Մեր երկրում բոլոր կառույցներն էլ գործում եմ, բայց ո՞նց են գործում, այ դա է խնդիրը, և թե ինչ մասնագետներ են աշխատում այնտեղ, քանի տարվա աշխատանքային փորձ ունեն»:
Միրզոյանը ողջունում է նույն քննչական կոմիտեում, դատախազությունում կադրային սերնդափոխությունը, երիտասարդ կադրերի ներգրավումը, սակայն կարծում է, որ համակարգին ավելի փորձառու մասնագետներ էլ են պետք: Իսկ փորձառությունը գալիս է աշխատանքային երկար տարիների փորձից: «Իհարկե ողջունելի է սերնդափոխությունը, որ երիտասարդները աշխատեն, ընդգրկվեն: Իհարկե, ծերերին պետք է հանել, բայց ոչ թե հանել ու ուղարկել: Պետք է թողնել, որ այդ ծերերը մինչև թոշակ հասնեն, անցնեն թոշակի ու դուրս գան: Ոչ թե կանչեն ասեն՝ դուրս արի ու գնա: Կարգ կա, այդ փորձառու մասնագետների վրա ժամանակին պետությունը գումար է ծախսել, ուղարկել է ուսման, վերապատրաստման, և հիմա եկել է ժամանակը, որ հատուցի, ծառայի, բայց կանչում ասում են՝ գնա: Սերնդափոխություն պետք է, բայց ոչ թե գերանդին առնեն ու հնձեն: Ջարդել պետք չէ»,- ասաց Միրզոյանը:
Հիշեցնենք, որ Անդրանիկ Միրզոյանը աշխատանքից ազատվեց շատ անսպասելի, Սերժ Սարգսյանի հրամանով: Նրա ազատվելուց հետո շատ վարկածներ շրջանառվեցին, բայց այդպես էլ հստակ պատճառը չնշվեց: Միրզոյանն այդ պատճառների մասին չի ուզում խոսել, այս ընթացքում էլ աշխատանքի բազմաթիվ առաջարկներ է ստացել, բայց դեռ հարմար տարբերակ չի գտել: Մեզ հետ զրույցում Միրզոյանն ասաց, որ այս պահին հուշեր է գրում, դրանով է զբաղված: «Այնքան գրելու բան կա, կարդալու բան կա: Զբաղվելու շատ բան կա: Փառք Աստծո»:
