Արցախահայ բարերար, գործարար Լևոն Հայրապետյանի խափանման միջոցն այդպես էլ չի փոխվում՝ չնայած այն հանգամանքին, որ վերջինիս առողջական վիճակը գնալով վատանում է:
Այսօր վաղ առավոտյան Հայրապետյանն անգամ կորցրել է գիտակցությունը: Նրան ուշքի բերելուց հետո, թեև ինքազգացողությունը չի լավացել, այդուհանդերձ կարողանում է շփվել իր փաստաբանների հետ:
Նրա ձերբակալության վերաբերյալ բավական կոշտ գնահատական է հնչել Արցախից՝ վարչապետի մակարդակով: Իսկ Հայրապետյանի ձերբակալությունը դատապարտող կամ գոնե նրան աջակցելու պատրաստակամության վերաբերյալ և ոչ մի հայտարարություն ՀՀ իշխանությունների կողմից չի հնչել:
Փոխարենը վարչապետ Հովիկ Աբրահամյանը լրագրողի հարցին ի պատասխան, խախտելով անգամ անմեղության կանխավարկածը, հեգնեց․ «Եթե մարդ օրենք է խախտում, ապա պետք է կալանավորվի, վաղն էլ կարող է Սիմոնին կամ Բարխուդարին կալանավորեն, ես ի՞նչ անեմ»:
«Ֆեյսբուք» սոցիալական ցանցում Հայրապետյանի պաշտոնական էջը հայտարարություն էր տարածել, թե հուլիսի 31-ին պատրաստվում է բողոքի ակցիա և երթ անցկացվել ի պաշտպանություն Լևոն Հայրապետյանի:
Ապա այդ էջը ղեկավարող խումբը հայտարարություն տարածեց, որ երթը չի կայանալու, որովհետև այս պահին դա չի բխում Լևոն Հայրապետյանի շահերից: Պատճառների մասին ավելի մանրամասն իմանալու համար հարցադրում արեցինք էջը ղեկավարողներին, որն անպատասխան մնաց:
«Առաջին լրատվական»-ը գրող-հրապարակախոս, Լևոն Հայրապետյանի մտերիմ Զորի Բալայանից հետաքրքրվեց, թե բավարա՞ր է, արդյոք, այն ամենն, ինչ անում է Հայաստանի Հանրապետությունն իր կարծիքով՝ հաջակցություն Լևոն Հայրապետյանի: Հետաքրքրվեցինք նաև, արդյո՞ք չպետք է գոնե բողոքի ակցիաներ և երթեր անցկացվեն՝ առնվազն Հայրապետյանի խափանման միջոցը փոխելու պահանջով:
«Ի՞նչ ասել է բավարար է, ես հետևում եմ, և ամեն օր խոսում են նրա առողջության մասին, համապատասխան փաստաթղթեր են գնացել, Վազգեն Մանուկյանն էլ, ինչքան գիտեմ, օգնում է: Շեշտը դրված է դրա վրա: Եթե Աստված մի արասցե, մի բան պատահի այդ հիվանդ մարդուն, ապա ամենավատը լինելու է մեզ համար: Միայն ինքը և ոչ ուրիշ մեկը կարող է իրեն արդարացնել, նա գիտի նրբությունները»:
Զորի Բալայանը հայտարարեց, որ առանց այս գործընթացը երկարացնելու պետք է նրան տեղափոխեն համապատասխան կլինիկա, և իր բժիշկները պետք է նրան բուժեն․ «Նրա վիճակը շատ բարդ է, ոչ մի երթ ու ցույց չեն օգնի Լևոնին, պետք է միայն իր բժիշկներն իրեն օգնեն ու լուծեն այդ խնդիրը, Հայաստանից, Գերմանիայից իր բժիշկները պետք է մեկնեն այնտեղ և օգնեն նրան»:
Լևոն Հայրապետյանի ընկեր և վստահված անձ Մացակ Փոլադյանը, որն այժմ գտնվում է Նիցցայում, բացասական է գնահատում Հայրապետյանի ձերբակալության հետ կապված Հայաստանի լռությունը: Բայց միևնույն ժամանակ Փոլադյանն ասաց, որ եթե այդ երթերը պետք է ի վնաս Լևոն Հայրապետյանի լինեն, ավելի լավ է՝ տեղի չունենան․ «Հայաստանի լռությունն ի վնաս Լևոն Հայրապետյանի է: Անշուշտ չեմ ասում այնպիսի երթերի մասին, որ վնաս հասցնեն Լևոնի այսօրվա վիճակին, բայց բողոքի ձայն՝ կլինի երթի, թե նամակի ձևով, անշուշտ հօգուտ Լևոն Հայրապետյանի է»,- ասաց Փոլադյանը:
Նա միևնույն ժամանակ ընդգծեց, որ զրուցել է Կոմանդոսի հետ, որը կասկածներ է հայտնել երթի հավուր պատշաճին կայանալու վերաբերյալ․ «Նա ասաց, որ այդ երթն անկազմակերպ է, նույնիսկ այն նամակը, որ պետք է հանձնվի ՌԴ դեսպանատանը, պատրաստ չէ: Նրա խոսքերով՝ այդ երթն իրավիճակը կվատթարացներ և ոչ մի օգուտ չէր բերի: Այդ պատճառով լավ է հիմա այդ երթը չանել»,- ասաց նա:
