«Առաջին լրատվական»-ի զրուցակիցն է Ժողովրդական կուսակցության նախագահ Տիգրան Կարապետյանը:
-Պարոն Կարապետյան, լավ թե վատ, քաղաքական դաշտում որոշակի իրավիճակ կա: Քառյակն է փորձում իրավիճակ թելադրել, ՕԵԿ-ն է ակտիվացման փորձեր անում՝ փորձելով խաղալ ընդդիմադիր դաշտում: Ինչպե՞ս եք գնահատում այս զարգացումները:
-Դա նոր ձևավորում չէ: Նույն ՕԵԿ-ը 10 անգամ ընդդիմադիր է դարձել, մի 10 անգամ էլ իշխանամետ: Դրանք հայտնի խաղեր են, ու ափսոս, որ ժողովուրդը չի հասկանում: Չնայած մի 300 հոգի, որ գալիս են հանրահավաքի, պարզ է, որ դրանք իրենց մոտիկներն են, թիմակիցները, ոչ թե ժողովուրդը: Քառյակն էլ, ոչ մի զարմանալի բան չկա: Նույն Դաշնակցությունն է, նույն ՀԱԿ-ը: Ես ոչ մի նոր բան չեմ տեսնում: Դրանք խաղեր են, որոնցով փորձ է արվում հիշեցնել, թե իրենք անհանգստանում են: Հետաքրքիր է, որ Արթուր Բաղդասարյանը պաշտոնի էր՝ ինչո՞ւ չէր խոսում նույն հոսանքի թանկացումից, գազի թանկացումից: Անպայման պետք է պաշտոնից զրկվեն, նոր խոսեն: Ես ոչ մի լավ բան չեմ տեսնում: Ընդդիմությունը շինծու է: Իշխանամետ ուժերը նույնն են: Ասում են՝ դեմ ենք հոսանքի թանկացմանը, տարբեր բաներին, բայց խունտային դեմ չեն: Դեմ լինել հատվածաբար՝ արդար չէ:
-Այսինքն՝ Արթուր Բաղդասարյանն ընդդիմադիր կարող է համարվել միայն այն դեպքում, եթե պահանջի՞ Սերժ Սարգսյանի հրաժարականը:
-ՕԵԿ-ը ինչ էլ պահանջի, վստահություն չունի ժողովրդի կողմից: Ինչքան կարելի է խաբել ժողովրդին: Մեծերն ասում են՝ ձու գողացողը ձի էլ կգողանա: Մի անգամ ժողովրդին դավաճանածը, էլի կդավաճանի: Ազնիվ ուժեր են պետք: Ուժեր, որոնց մտահոգում է հայ ժողովրդի ապագան, որն ապրում է անարդարության մեջ:
-Իսկ տեսնո՞ւմ եք այդպիսի ուժեր:
-Դեռ ոչ: Եթե տեսնեինք՝ մենք կլինեինք նրանց կողքին:
-Պարոն Կարապետյան, այսօր լրացավ Հովիկ Աբրահամյանի պաշտոնավարման 100 օրը: Որևէ նկատելի աշխատանք տեսնո՞ւմ եք, որ կատարվել է այդ 100 օրվա մեջ՝ սկսած օլիգարխներին ստվերից դուրս բերելու քայլերից:
-Ոչ: Ինչ էլ որ արվել է, կոսմետիկ միջոցներ են, որոնք ոչ մի բան չեն փոխվում: Ինչի, մենք չգիտե՞նք՝ ովքեր են այդ օլիգարխները: Նրանք ոնց կան անսասան՝ այդպես էլ մնացել են: Ինչն է փոխվել: Ոչ մի բան չի փոխվել, ընդամենը իմիտացիա է արվում: Եթե իրենք բիզնեսով են զբաղվում, ղեկավարությունը, իշխանությունը բիզնեսով է զբաղվում, փայատեր է օլիգարխների հետ՝ ինչպե՞ս կարելի է իրենց ստվերից հանել: Իշխանությունը իրե՞ն պետք է ստվերից հանի: Նույն Հովիկ Աբրահամյանը, նրա եղբայրը, փեսան, որդին օլիգարխներ են, նախարարները օլիգարխներ են: Նրանք կապված են բիզնեսի հետ, և այստեղ անհնար է որևէ բան անել: Դե, թող հրաժարվեն իրենց արտոնություններից, բայց այդպիսի բան չի լինի: Էսքան ժամանակ չեմ տեսել, որ մեկը հրաժարվի իր արտոնություններից: Այն սյուները, որոնց վրա հիմնված է բիզնեսը, նրանք այդ սյուների մեջ են: Քաղաքական կամք է պետք իրավիճակը փոխելու համար, որը դեռ չկա:
-Պարոն Կարապետյան, այս օրերին ակտիվորեն քննարկվում է գործարար Լևոն Հայրապետյանի կալանավորման փաստը: Տարբեր վարկածներ են շրջանառվում: Դուք էլ էիք մի ժամանակ Ռուսաստանում բիզնես գործունեություն ծավալում: Ձեր կարծիքով, որո՞նք են Հայրապետյանի կալանավորման հիմքերը: Արդյո՞ք դա քաղաքական ենթատեքստ ունի:
-Այո, դա քաղաքական ենթատեքստ ունի: Նա Հայաստանի իշխանություններին դեմ է խոսել, դրա համար էլ այդպիսի բան եղավ: Նա Ֆրանսիայում քննադատել է մեր իշխանություններին: Յուրաքանչյուր դեմ խոսելը նրանք թշնամաբար են ընդունում և հակադրվում են: Պետք է անպայման նրանց թրի տակով անցնես: Ինձ հետ էլ նույնը եղավ: Հեռուստաընկերությունը վերցրին, թալանեցին, քցեցին: Նույն պատկերն է, նույն խաղերն են: Ոչ մի բան չի փոխվել:
