News Georgia-ի փոխանցմամբ՝ ԱՄՆ պետքարտուղարի երկրորդ տեղակալ Էրիկ Ռուբինը Վրաստան կատարած այցի ժամանակ հայտարարել է, որ ԱՄՆ-ը կարող է շուտով պաշտպանական սպառազինություն մատակարարել Վրաստանին:
Ռուբինը Վրաստան է ժամանել երեքշաբթի գիշերը և Վրաստանում հանդիպումներ ունեցել նախագահ Միխեիլ Սաակաշվիլիի ու վարչապետ Բիձինա Իվանիշվիլիի, ինչպես նաև հասարակական կազմակերպությունների ու միջազգային կառույցների ներկայացուցիչների հետ:
Հինգշաբթի Ռուբինը մասնակցել է Վրաստանի ու ԱՄՆ-ի միջև ռազմավարական գործընկերության խարտիայի շրջանակներում ստեղծված պաշտպանական ու անվտանգության աշխատանքային խմբի հանդիպմանը, որի ժամանակ հայտարարել է. «Մենք պատրաստ ենք այս փուլում Վրաստանին օգնել զինվորականների դասընթացների հարցում, ինչպես նաև խորացնել մեր համագործակցությունն ինքնապաշտպանական ոլորտում: Այդ համագործակցությունը ենթադրում է նաև Վրաստանին մատակարարել պաշտպանական սարքավորումներ»:
Ռուբինը հիշեցրել է, որ այս տարվա հունվարին ԱՄՆ նախագահ Բարաք Օբաման և Միխեիլ Սաակաշվիլին պայմանավորվել էին ռազմական համագործակցության խորացման շուրջ:
Էրիկ Ռուբինը վերջին անգամ Վրաստան էր այցելել հոկտեմբերի կեսերին՝ խորհրդարանական ընտրություններից հետո:
