Walmart ամերիկյան հանրախանութների ցանցը խզել է հարաբերությունները մատակարարի հետ, որը պատվերներ էր բացել Բանգլադեշի գործարանում: Նոյեմբերի 24-ին այդ գործարանում տեղի ունեցած հրդեհի հետևանքով զոհվել էր ավելի քան 100 մարդ:
Ինչպես հաղորդում է France-Presse-ը, Walmart-ը հայտարարել է, որ մատակարարն առանց պատվիրատուի համաձայնության ենթակապալառու է վարձել: Հանրախանութների ցանցը խոստացել է բարձրացնել Բանգլադեշի տեքստիլ ձեռնարկություններում հրշեջ անվտանգությունը:
Նոյեմբերի 26-ին Walmart-ն ընդունել է, որ որոշ պատվերներ է բացել Բանգլադեշի մայրաքաղաք Դաքայում գտնվող Tazreen Fashion գործարանում:
Շաբաթ օրը տեղի ունեցած գործարանի հրդեհից հետո պարզվել է, որ Tazreen Fashion գործարանում արտադրվել է արևմտյան ապրանքանիշների հագուստ, ներառյալ Walmart-ին պատկանող Faded Glory ապրանքանիշը:
Գործարանի պատվերների թվում եղել է նաև ENYCE ապրանքանիշը, որի սեփականատերը ամերիկացի ռեփեր Շոն Կոումզն է: Վերջինս նախկինում հայտնի էր Փաֆ Դեդի, իսկ այժմ՝ Դիդի անվամբ:
Նշենք, որ նոյեմբերի 27-ը Բանգլադեշում պաշտոնապես հայտարարվել է սգո օր, ինչի կապակցությամբ փակ են երկրի արտադրական ձեռնարկությունների մեծ մասը:
