«Սև ուրբաթ օրը» մանրածախ օնլայն առևտուրն առաջին անգամ գերազանցել է 1 մլրդ դոլարը։ Այս մասին հաղորդում է Reuters-ը՝ հիմնվելով comScore Inc. վերլուծական ընկերության տվյալների վրա:
Ինտերնետ–վաճառքների ծավալը սեզոնի նախատոնական սուրբծննդյան զեղչերի առաջին օրը մեծացել է 26 %-ով ու կազմել 1,04 մլրդ դոլար՝ նախորդ տարվա 816 մլն դոլարի համեմատ: Ընդ որում՝ ամենաայցելելի կայքերն են եղել Amazon.com-ը, Wal-Mart Stores-ը, Best Buy-ը, Target-ը ու Apple-ը:
Միևնույն ժամանակ, ընդհանուր առմամբ, այս տարի ԱՄՆ-ի գնորդները ծախսել են 1,8 %-ով քիչ գումար, քան անցյալ տարի։ Վաճառքի ծավալը կազմել է 11,2 մլրդ դոլար։ 2011 թ. գնորդների ծախսերը հասել են 11,40 մլրդ դոլարի: Այս մասին ասվում է ShopperTrack վերլուծական ընկերության՝ նախօրեին հրապարակած հաղորդագրության մեջ:
Նշենք, որ «Սև ուրբաթն» ԱՄՆ-ում նշանավորում է ավանդական սուրբծննդյան զեղչերի սկիզբը:
