ՄԱԿ Անվտանգության խորհուրդը մտադիր է նոր պատժամիջոցներ սահմանել Կոնգոյի Ժողովրդավարական Հանրապետության (ԿԺՀ) М23 («Մարտի 23-ի շարժում») ապստամբ խմբավորման ղեկավարության և խմբավորմանը սատարողների դեմ: Այս մասին հաղորդում է RIA Novosti-ն՝ վկայակոչելով ՄԱԿ ԱԽ-ի բանաձևը:
Փաստաթղթում նշվում է, որ ԱԽ-ը դատապարտում է M23 գրոհայինների կողմից հարձակումները վերսկսելը Հյուսիսային Կիվու մարզում և նրանց ներխուժումը Գոմա քաղաք: Այս կապակցությամբ ՄԱԿ ԱԽ-ը մտադիր է դիտարկել հավելյալ պատժամիջոցներ М23 խմբավորման ղեկավարության դեմ՝ 1857 հասատատված բանաձևի չափանիշներով: Պատժամիջոցներ կսահմանվեն նաև М23-ին արտաքին աջակցութոյւն ցուցաբերողների դեմ, որոնք խախտում են պատժամիջոցային ռեժիմը և զինամթերքի մատակարարման արգելքը:
Նշենք, որ երեքշաբթի M23 գորհայինները մտել են Գոմա քաղաք և հայտարարել, որ գրավել են միջազգային օդանավակայանը: ԿԺՀ-ում ՄԱԿ խաղաղապահները պնդում են, որ վերահսկում են իրավիճակը:
ՄԱԿ ԱԽ-ը M23 գրոհայիններից պահանջել է անմիջապես լքել Գոման, վայր դնել զենքը և վերականգնել պետական իշխանությունը Հյուսիսային Կիվուում:
ԿԺՀ իշխանությունները M23 գրոհայիններին աջակցելու համար մեղադրում են հարևան Ռուանդային:
