Ռուսական Interfax լրատվական գործակալության փոխանցմամբ` Իրանը տեխնիկապես պատրաստ է ուրանի հարստացման կրկնապատկմանը, որը կարող է գործածվել միջուկային լիցքի ստեղծման համար: Այս մասին նշված է ԱԷՄԳ-ի երեկվա զեկույցում:
ԱԷՄԳ-ի տվյալներով` Իրանն ավարտել է «Ֆորդո» միջուկային օբյեկտի տեխնիկական հագեցվածության աշխատանքը. ներկայում այնտեղ տեղադրված է 2800 ցենտրիֆուգ:
ԱԷՄԳ-ը կարծում է, որ արտադրության մեծացումը թույլ կտա մոտավորապես երկու անգամ կրճատել այն ժամանակը, որն անհրաժեշտ է ատոմային զենքի ստեղծման նպատակով բավականաչափ միջուկային նյութ կուտակելու համար:
Նոյեմբերին ԱԷՄԳ-ի ղեկավար Յուկիա Ամանոն հայտարարել էր, որ իրանական իշխանությունները շարունակում են Թեհրանի մոտ գտնվող «Փարչին» ռազմաբազայում գտնվող օբյեկտների վերացման գործընթացը, որոնցում հնարավոր է` անցկացված լինեն միջուկային փորձարկումներ:
