Տրանսպորտի և կապի փոխնախարար Արթուր Առաքելյանը լրագրողների խնդրանքով հունիսի 9-ին անդրադարձավ Ռուսաստան – Վրաստան ավտոմայրուղու Լարսի անցակետի խնդրին: Փոխնախարարը նշեց, թե արդարացված է տնտեսագետների պնդումը, թե դա ամենակարճ ու տնտեսապես ամենաշահավետ ավտոմոբիլային ճանապարհն է, որ Վրաստանով միացնում է Հայաստանը Ռուսաստանի հետ: «Ցավոք, բնակլիմայական պայմաններով պայմանավորված՝ քարաթափում է տեղի ունեցել, սողանք է եղել, ու շատ լուրջ իրավիճակ է ստեղծվել: Մի քանի շաբաթ գնում են աշխատանքներ՝ կապված բացելու հետ»,- ասաց նա:
Առաքելյանը նշում է, որ այն գտնվում է Կառավարության ուշադրության կենտրոնում, վարչապետը այս հարցով զրուցում է Վրաստանի և Ռուսաստանի իր կոլեգաների հետ, տրանսպորտի նախարարության կողմից ծրագիր է մշակվել, թե ինչ անել՝ հարևան պետություններին հորդորել միջոցառումներ ձեռնարկել, որ բացառվեն այդ բարդ հատվածում նման երևութները, ուժեղացնել սպասարկման հնարավորությունները այդ հավածն սպասարկող կազմակերպություններին, բացասական բնակլիմայական պայմանների դեպքում պայքարել:
Հարցին՝ հաշվարկներ կա՞ն՝ որքա՞ն է եղել վնասը, նա նշեց, որ իրենց լիազորությունների ներքո չի գտնվում, հաշվարկներ չեն արել, բայց ընդհանրապես տնտեսվարողներն իրազեկված են: Առաքելյանը նշեց, որ մինչև ամսի տասներկուսը սպասում են լավ լուրերի, բայց կանխատեսումներն էլ շնորհակալ գործ չեն:
