Քառյակի քաղաքական օրակարգում դրված չեն գործող կառավարությանը վերաբերող այն խնդիրները, որոնց անդրադարձել է Լևոն Տեր-Պետրոսյանն իր վերջին հոդվածում: Այս մասին այսօր լրագրողների հետ հանդիպման ժամանակ ասաց ԱԺ ԲՀԿ-ական պատգամավոր Միքայել Մելքումյանը՝ անդրադառնալով Լևոն Տեր-Պետրոսյանի վերջին հոդվածում նոր կառավարության նկատմամբ արված քննադատությանը:
«Ես Լևոն Տեր-Պետրոսյանի շատ վերլուծությունների ու մեկնաբանությունների հետ միգուցե համաձայնեմ, բայց մի շարքի հետ էլ այլ կարծիք ունենամ: Իսկ ընդհանուր առմամբ չէի ուզենա խորը մեկնաբանեի: Քառյակի քաղաքական օրակարգում այդ խնդիրները դրված չեն, ինքը որպես hանրապետության առաջին նախագահ իր մեկնաբանությունները տալիս է, որի իրավունքն ունի: Հիմա մենք չշտապենք, սպասենք դեպքերի ընթացքին:
Գիտեք, որ 4 քաղաքական ուժերը ունեն օրակարգ, դա արձանագրվում է այն 12 պահանջներով, որը եկող շաբաթվա սկզբներին ամենայն հավանականությամբ կներկայացվի հանրությանը, քաղաքական ուժերին և իշխանություններին, և այդ կոնտեքստում մենք կտեսնենք, որ այդտեղ դրված են և՛ քաղաքական լրջագույն պահանջներ, և՛ տնտեսական, և՛սոցիալական: Կլինեն նաև խնդիրներ, որոնք վերաբերում են առավել կարճաժամկետ լուծումների, և խնդիրներ կան, որոնք ավելի ռազմավարական բնույթ են կրում: Բայց սա` այն նվազագույն պահանջները կլինեն, որ կառավարության առջև կդրվեն, և ըստ այդմ, ըստ լուծման ընթացքի, եզրակացություններ կարվեն: Այսինքն՝ այս կոնտեքստով ես Լևոն Տեր-Պետրոսյանի հոդվածը և մեկնաբանությունը չէի կապի քառյակի այս քաղաքական օրակարգի հետ»,- ասաց Մ. Մելքումյանը:
