Արագածոտնի մարզի Աշտարակ քաղաքում վագոն-տնակում ապրող սոցիալապես անապահով 19-ամյա Մարիամ Սողոմոնյանը ԿԳ նախարար Արմեն Աշոտյանին բաց նամակ էր ուղղել, որում օգնություն է խնդրում ԵՊՀ-ում կրթությունը շարունակելու համար:
19-ամյա Մարիամի ընտանիքը չի կարողանում վճարել ԵՊՀ քիմիայի ֆակուլտետի 300 հազար դրամ վարձավճարը, այդ պատճառով նախորդ տարի բուհից դուրս է մնացել: Նա չի կարողացել անվճար հիմունքներով ընդունվել, քանի որ կրկնուսույցի մոտ չի հաճախել: «Սովորեցի երկու կիսամյակ, բայց առաջին կուրսը չավարտեցի, քանի որ ընտանիքս ի վիճակի չէր մայիսին վճարել ուսմանս վարձը, որը 300 հազար դրամ է: Ինձ լրացուցիչ ժամանակ տրամադրեցին, որ գոնե հունիսին վճարեմ, բայց այդ ժամանակ էլ չկարողացա ու դուրս մնացի համալսարանից: Ես ուզում եմ շարունակել ուսումս»,- ասվում է բաց նամակում:
«Առաջին լրատվական»-ը ԿԳ նախարար Արմեն Աշոտյանից հետաքրքրվեց՝ 19-ամյա Մարիամ Սողոմոնյանին կրթությունը շարունակելու հարցում օգնություն ցուցաբերվելո՞ւ է: «Այդ նամակի հետքերով գնում ենք, վարչության պետին հանձնարարել եմ, ամեն ինչ այդնես չէ, ինչպես ներկայացված է նամակում: Նրան առաջարկվել է վերականգնում այն կիսամյակից, որից դուրս է մնացել: Տարօրինակ է, որ 2013-ին է եղել, հիմա է բարձրաձայնում: Նախ՝ «Փարոսի» հետ կապված խնդիրներ են եղել, փաստաթղթեր չեն ներկայացվել»,- պատասխանեց նախարարը՝ հավելելով, որ նախկին ուսանողի իրավունքները կվերկանգնվեն: «Լավ սովորելու պայմանով: Թե չէ՝ մոդայիկ է դարձել բաց նամակ գրելը»,- եզրափակեց նախարարը: